Nurse chawimawina sang dawngtu hnenah Mizoram sorkarin chawimawina a hlan

Health & Family Welfare minister Lalrinpuii chuan nimin khan a pisaah tun hnaia India President hnena aṭanga India rama nurse chawimawina sang ber, National Florence Nightingale Award dawngtu V Lalhmangaihi, Civil Hospital, Aizawl nursing officer hnenah chawimawina thuchei leh Rs 50,000 a hlan.

Lalrinpuii chuan, India ram state hrang hranga mipui tam tak karah Mizo zinga Florence Nightingale Award hial la thei an awm ṭhin chu a lawm thu a sawi a, "Pi V Lalhmangaihi thawhrimna leh inpekna hi a entawn tlak tak zet a ni a, nursing care-ah hmasawn zel turin thawktute'n ṭan la ang che u," a ti.

He hunah hian Health secretary H Lalengmawia, DHME director Dr SR Ngurchamliana leh award dawngtu V Lalhmangaihi-ten thu an sawi a; Mizoram aṭanga he award lo dawng tawhte zinga Aizawl district-a awm mi panga pawh an tel.

National Florence Nightingale Award hi sorkar laipuia Ministry of Health and Family Welfare chuan kum 1973 khan nurse leh nursing professional-te’n khawtlang tana an rawngbawlna ṭha tak takte hriatrengna atan a din a ni.

V Lalhmangaihi nen hian Mizoram chhunga thawk nurse 17-in an dawng tawh a; Mizo nurse, state dawnga thawk pahnihin dawng tawh bawkin, Mizo nurse zinga he award dawng tawh zawng zawng hi 19 an ni.