KHAWTHLIR

CADS ṭanpui

Central YMA hnuaia ruihhlo dotu CADS ṭanpuina atan nimin khan Central YMA hnenah Chaltlang Lily Veng Presbyterian Kohhranin Rs. 10,000 leh Lalramthanga, Kulikawnin Rs. 10,000 an hlan.

Chetsualnaah thi

Lalhminghlua (24) s/o Lalruati, Kolasib New Diakkawn chu maxi cab-in a chhilh avangin June 16, Thawhṭanni zan dar 8:40 khan a thi. Lalhminghlua hi maxi cab-a Diakkawn TC road aṭanga a tlan chho chu a zo loa, motor aṭanga chhukin jam kam a tum laiin maxi cab hi lirin, maxi cab hian kawng sira in bang nen a luah a chilh. Damdawi-in panpui nimah se, chhan theih a ni tawh lo.

Khawmpui hmang

Nimin khan Mizoram Cooperative Fish Farming Marketing & Processing Federation Ltd. (ZOFISFED) chuan IPR auditorium-ah khawmpui vawi 21-na an hmang a; khuallian Cooperation minister PC Vanlalruata chuan, sangha khawi kawnga hmasawnna hmel thar hmuh a nih theih nan theihtawp chhuah turin a fuih. ZOFISFED hnuiah hian affiliated cooperative society 43 an awm mek a ni.

MLA-in enfiah

Kolasib bialtu MLA Lalfamkima, dy. speaker chuan nimin khan Kolasiba zirna-in hrang hrangte tlawhin, an dinhmun a enfiah. Lalfamkima hian zirtirtuten an zirlai naupangte an enkawl ṭhat leh ṭhat loh enfiahin, classroom a fankual bakah zirlai naupangten an zirlai an thiam leh thiam loh a zawt. Zirtirtute chu an sikulin harsatna an tawh dan leh an dinhmunte zawtin, a hnena sawi duh an neihte a ngaihthlaksak.

Project BLOOM

Lunglei district bawrhsap Navneet Mann chuan nimin khan Lungsen Primary Health Centre (PHC)-ah Lungsen Aspirational Block huamchhunga nu, naupang leh chhungkaw tin hriselna leh chawikanna tur - Project BLOOM a hawng a; Project BLOOM 'Maternity Waiting Room' ruahmantu chhungkaw panga hnenah lawmthu sawina thilpek leh raipuar panga hnenah nau an neih huna an hman ṭangkai tur 'BLOOM Gift Basket' pek a ni.