Ropeway siam dan tur sawiho

Governor Gen. Vijay Kumar Singh chuan nimin khan Ministry of Road Transport and Highways (MoRTH), National Highways Logistics Management Limited (NHLML) leh Urban Development & Poverty Alleviation (UDPA) department hotute Raj Bhavan-ah kawmin, sorkar laipui hnuaia 'National Ropeways Development Programme - Parvatmala Pariyojana' hmanga Mizorama ropeway siam theih dan tur an sawiho.

Gen. VK Singh chuan, khawpui tawt zel tur ven nan ruahmanna hrang hrang neih a pawimawh thu leh hmalak ran chu thil tihmakmawh a nih thu a sawi a, "Tun dinhmunah Aizawlah hmun âwl a tam tawh loh avangin sorkar project kalpui turin Aizawl khawpui chauh melh loin, hmun dangte pawh ngaihven tel zel a ṭul tawh a, inkalpawhna leh mipui veivahnate chu ngaihven hmasak ngai a ni," a ti.

Tlangrama chengte inkalpawhna atana sorkar laipui project - 'Parvatmala' chu ṭangkai taka hman a ṭul thu sawiin Larsap chuan, line department dangte nen inráwntlánga he scheme hi chhawr ṭangkai dan tur ngaihtuah tlan a ṭul thu a sawi bawk.

MoRTH addl. secretary Vinay Kumar chuan Mizorama ropeway project kalpui turin theihtawp chhuah an inhuam thu a sawi a, Parvatmala chu tlangrama inkalpawhna siam nana project ṭangkai tak a nih thu leh hemi aṭanga sum hmuh (revenue) 90% chu khawtual hmasawnna hna thawh nan hman theih a nih thu a sawi.

UDPA secretary Lalmalsawma Pachuau chuan Aizawl khawpui leh a chhehvela ropeway corridor hrang hrang din tura ruahmanna, 'Ropeways Under Aizawl Sustainable Urban Transport Project (ASUTP)' chungchang a sawifiah a; Aizawl leh a chhehvel sq.km 280 a zauah khawpui tawt tihziaawm nan comprehensive mobility plan siam a nih thu leh hemi hian project hrang hrang - ropeway, improve pedestrianisation, regional truck terminal, bus & truck terminal, improvement of bus system leh a dangte a huam thu a tarlang.