Chhiatna tawkte ṭanpuina hlan

Serchhip Sub-Hqrs. YMA chuan tunhnaia ruahsur nasa avanga chhiatna tawkte ṭanpuina atana Serchhip khawpui chhung branch YMA-a vehbur an khawn aṭanga an sum hmuhte chu nimin khan an sem chhuak.

Vehbur an khawn aṭang hian Serchhip Sub-Hqrs. YMA chuan Rs. 3,94,850 an hmu chhuak a, Serchhip khawpui chhunga chhungkaw 26 leh Serchhip khawpui pawna chhungkaw 10 hnena pek turin ruahmanna an siam. Chhiatna an tawh dan a zirin ṭanpuina pek zat tur an bithliah a ni.

Serchhip Sub-Hqrs. YMA hruaitute chuan nimin zing khan Serchhip khawpui chhunga chhiatna tawk chhungkaw 16-te chu ṭanpuina hi an hlan a, Serchhip khaw pawna chhiat tawkte ṭanpuina tur chu remchang hmasa berah an thawn ang.

Ṭanpui ngaite ṭanpuina tura thâ leh zung sengtu leh, sum leh pai thawhtute zawng zawng chungah Serchhip Sub-Hqrs. YMA chuan lawmthu an sawi.