Mizoram sorkarin hmunphiahah Grading a kalpui tawh dawn lo

Chief minister Lalduhoma hoin nimin khan Secretariat conference hall-ah Land Resources, Soil & Water Conservation (LRSWC) department hmalakna thlirletna neih a ni a; hmunphiah hralhna chungchanga grading an kalpui chu kum tharah chuan kalpui a nih tawh loh tur thu tarlan a ni.

Lalduhoma chuan, ZPM sorkarin thil thar an ching chhuak nual tih a sawi a, "Sorkar hnathawkten ṭha taka min lo thlawp kan beisei. Hna hi thawh chak kan duh, kan ram hian hmasawnna hmel hi hmu thuai thuai ila kan duh a, chuvang chuan heng thil tharte hi kan kalpui a ni. Review meeting hi thil dik lo zawnga buatsaih ṭhin ka ni lo a, in harsatna leh in mamawhte rawn hriatsak che u ka duh vang zawk a ni," a ti a, meeting ṭangkai tak a nih theih nan an ngaimawh thilte inthlahrung loa sawi turin kalkhawmte a sawm.

Hmunphiah hralhna chungchangah kumina grading kalpui kha loneitute tan harsatna a thlen avangin kum tharah chuan grading hi kalpui a nih tawh loh tur thu Chief Minister chuan a sawi.

He hunah hian LRSWC minister Lalthansanga, adviser to CM (finance) TBC Lalvenchhunga, Planning secretary Vanlaldina Fanai bakah Planning leh Finance department official-te an tel a; LRSWC secretary Lalsangliana'n tun hnaia an department hmalakna, hlawhtlinna leh hmachhawpte sawifiahin, kuhva rah sawngbawlna (process) tur chu NEC fund aṭangin Chemphaiah leh Zamuangah din mek a nih thu a sawi.

Ṭhutkhawmah hian Chief Minister's Rubber Missions a lo hlawhtlin lehzual theih nan rubber clustee link road ngaih pawimawh dan dap a ṭul thu sawi a ni a; CM Rubber Missions thawh khatnaah cheng nuai 2798.13 dah a ni a, kumin a kum khatnaah hian nuai 1364.14 kan pe chhuak (expenditure sanction) tawh a ni.

Sum hi NABARD RIDF XXX aṭanga hmuh a ni a, Kolasib leh Mamit district-ah kalpui phawt tur a ni a, kum tharah district dangah tih zui zel a ni ang. Kumtin hectare 1,000 zelah phun belh tum a nih thu leh kuminah loneitute'n an phun hman ngei theih nan a chi supply chu rang taka bawhzui a ṭul thu an sawi.

ṬHUTKHAWMNAA TARLAN ṬHENKHAT
* Soil department allocation of business ṭhenkhat enṭhat a ngai.
* Coffee hi Soil department crop-ah la dahzui zel tur a ni.
* Saitual office cum quarters enkawlna tur sum ennawn ni se.
* Departmental works kalpui a nih hian department ṭhenkhatten an project-ah GST an chhût tel lo ṭhin a, sorkarin chhiah tam tak a chán ṭhin.
* GST chungchang hi department zawng zawngin lo hria se, sorkarin departmental work kalpui dan tur a duan ang thlapa kal ṭhin tur a ni.
* Rubber Rolling Machine set hi ṭhelret (rubber) ching mekte'n an mamawh êm avangin cluster-te'n inhmanṭawm tur subsidy-a pek atan Handholding aṭangin 100 tal ngaihtuah ni se.