Minister-in kut hnathawktute hmunhma kalchilha hna thawk turin dept. mite a chah

Horticulture minister C Lalsawivunga chuan, Horticulture department mite chu dawhkan aṭanga hna thawk mai loin, kut hna­thawktute hmunhmaah kalchilha hna thawk turin a chah a; kut hnathawktute thawhrah hmawrbawkna, marketing lam hmasawnna turin sorkarin dan leh hrai a duan mek thu a sawi.

C Lalsawivunga hian nimin khan Aijal Club Park-ah Horticulture Fair, 2025 a hawng a; fair puala Aijal Club Hall-a inkhawmah thu sawiin, Horticulture department mithiamte leh kut hnathawktute inkarah thawhhona ṭha a awm a pawimawh thu a sawi a, "Depart­ment mi­thiamte chuan thlai leh theite hlawk zawka chìn leh enkawl dan turte an hria a, chuvangin depart­ment lam hian mawh­phurh­na kan nei sang hle. Dawhkana hna kan thawh ṭhin hi a tawk tawh e, a field-ah ngei hian hna i thawk ang u, kan kut hna­­thawktute ṭanpui turin kan inbuatsaih a ṭul hle," a ti.

Kut hnathawktute leh department thawhhona kaltlangin ram hmasawn-na a thlen a beisei thu sawiin Horticulture Minister chuan, "Kut hna-thawktute'n an mamawh hun apianga an koh eih theih leh an koh kal theih department mithiam nih hi a hlu a, a ropui a ni. Kan ṭanho phawt chuan hlawhtlinna hmel duhawm kan ram hian a hmu ang tih hi ka beisei. Thil kan tih reng rengah ti dêm dûm loin, pakhatah hlawhtlin ngei tumin insawrbing ang u," a ti a; department mite leh kut hnathawktute an inthlunzawm ṭhat a ṭul thu a sawi.

C Lalsawivunga chuan kut hnathawktute thar chhuahte aṭanga sum lakluhna (marketing) lamah hmasawn a pawimawh thu a sawi a, "Kan kut hnathawktuten an thawk mawlh mawlh a, a rah seng hunah an senga, chutah chuan an mittui a luang ṭhin. Kan taima a, hnathawh pawh kan peih a, hnathawh dan leh a kalhmang pawh kan thiam, mahse, a hmawr bawkna leh pawimawh lai ber a marketing lam kan tlachham ṭhin a, hei hi a pawi em em a ni," a ti.

Sorkarin thei leh thlai hmanga kut hnathawktute din chhuah theihna tur a ngaihpawimawh thu Minister chuan a sawi a, "Kut hnathawktute thei leh thlai thar chhuahte awmze nei zawka sum chang tura kalpui a nih theih nan Assembly Budget Session hnuhnung berah khan sawi hlawh takin bill kan pass a, hemi atan hian wine rules leh regulation-te buaipui chho mek a ni a, Law department-in an vet anga, chumi hnuah Assembly-ah pharh leh a ni ang," a ti a, state dangin thlai leh thei hmanga leilung hausakna an haichhuahte hlawk taka an kalpui theih chuan Mizoram pawhin a tih ve theih lohna tur a awm loh thu a sawi bawk.

Horticulture Fair hi Horticulture department buatsaih niin, a vawi 11-na a ni a; kum 2012 aṭang khan buatsaih ṭan niin, Covid-19 avangin kum 2020 leh 2021-ah buatsaih a ni lo. Kum 2012-2024 thleng khan fair-a dawr (stall) siamte hian an thil hralhna aṭangin Rs 346,30,607 an hmu tawh.

Kumin fair-ah hian stall 205 - pangpar zawrhna 128, thei ṭiak zawrhna 60, leiṭha leh hmanraw dang zawrhna 11 leh pot zawrha paruk hawn a ni.

Fair hawnnaah hian Best Horticulture Farmer, 2025 leh Best Performing Horticulture District, 2025 lawmman sem a ni a; Horticulture department leh Selco Foundation ṭangkawp hmalaknain Best Horticulture Farmer-te hi solar sprayer pek vek an nih bakah, state dangah exposure visit neihpui an ni dawn. Best Performing Horticulture District Award dawngtute hnenah a mamawhten leiṭha bakah rannung leh natna laka thlai venna tur damdawite phuh/kahna tur drone (custom hiring system) an dawng bawk a ni.