Cambodia-ah North East India Day hmang

Cambodia khawpui Phnom Penh-a Indian Embassy chuan June 14, Inrinni khan 'North East India Day' an buatsaih a; Cambodia-a Mizo awmte'n hnam lâm an entir.

June 14-a North East India Day buatsaih hi a vawi hnihna a ni a, India rama hmarchhak state mi Cambodia rama awm mi ṭhahnem tak an tel. Hmarchhak state mite'n an hnam lâmte an entir a; Mizote pawhin Cheraw an entir bakah, Domangi Zai (German rál rûn hla) an rem a; SEAMS hnuaia missionary (tentmaker) Ruthi C Lalchhanhimi a zai bawk.

North East India Day-ah hian Cambodia-a India ambassador Vanlalvawna Bawitlung-in thu sawiin, NE India Day buatsaih chhan a sawi a; India hmarchhak mi Cambodia rama awmte'n harsatna an tawha ṭanpui turin Indian Embassy a inhawn reng thu sawiin, harsatna an neih chuan Embassy-a thlen hre lo turin a chah.

Vanlalvawna hian India hmarchhak mite chanchin leh dinhmun tlangpui a sawi a; India leh Cambodia ram inlaichinna chungchang a sawi bawk.

North East India Day-ah hian Cambodia Foreign Affairs secretary of state Dr Khy Sovan Ratana chu khuallian a ni a; India hmarchhak state ṭhenkhat a tlawh tawh thu te, Cambodia leh India ten inkungkaihna thûk tak an nei a, sakhua, hnam nunphung leh ṭawng thlengin India aṭanga thil tam tak an seng luh thu te, India hmarchhak mite chu Cambodia ramah thlamuang takin awm zel se a duh thute a sawi.

North East India Day-a telte hian Indian Embassy buatsaih chawhlui an kilho nghal a ni.