Mizoramah badminton academy ṭha neih tuma hmalak a ni - Sports Minister

Sports & Youth Services minister Lalnghinglova Hmar chuan, Mizo badminton player ṭhate academy ṭhaah an awm vek thei dawn lo tih sawiin, Mizoramah academy ṭha neih tuma hmalak mek a nih thu a sawi.

Sports Minister hoin nimin khan a pisaah Pullela Gopichand Badminton Academy (PGBA), Tata Trusts leh Mizoram Badminton Association hruaitute'n Mizorama badminton tihhmasawn dan tur an sawiho a; PGBA leh Tata Trusts hotute Mizorama an lo kal chu a lawm thu a hrilh.

Lalnghinglova Hmar chuan, kum 2036 Olympics-ah Mizo infiammi a tam thei ang ber India aiawhin tel se an duh thu sawiin, "Chumi tur chuan tuna PGBA leh Tata Trusts nena kan thawhhona hi lian zawka kalpui kan duh. Mizoramah badminton academy ṭha neih kan tum mek," a ti a, sports science leh sports injury inenkawlna kawngah hmabak a la tam thu a sawi.

Mizo player-te'n training mumal tak leh kaihhruaina ṭha an dawn chuan badminton-ah talent an nei tih tun hnaia result aṭangin a lang tih sawiin Minister chuan, "Kum 10 chuang nghah ngai tura kan ngaih kha kum li vel lek chhungin hlawhtlinna duhawm tak tak kan nei a ni," a ti.

PGBA dintu leh Badminton National chief coach Pullela Gopichand, Badminton Association of India vice president ni bawk chuan, player ṭha tak pakhat chher chhuak turin mi eng emaw zat ṭan rual a ngaih thu a sawi.

Pullela Gopichand chuan, Mizoram Badminton Association-in theihtawp chhuaha an lo thawhpui avangin an lawm thu sawiin, "Mizoram hi a boruak a ṭha a, ram leilungin a zir avangin kum 10-15 a ral leh chuan India rama player ṭhate'n training-na tur boruak ṭha an mamawh dawn a, chumi tur chuan training centre ṭha lo neih a ngai. Talent leh result mila hmunhma ṭha neih a pawimawh," a ti.

Sawihonaah hian Tata Trusts head of sports Neelam Babardesai leh Tata Trusts (NEIDA) senior consultant Sajith John te pawh an tel. Pullela Gopichand leh Neelam Babardesai te hi June 14, 2025-a 1st Mizoram Grassroots Badminton League kharna programme-ah an tel dawn a ni.