Zirtirtu transfer order sût phûtin Parva-ah sikul zawng zawng khâr

Parva khawtlang mipui chuan Parva High School-a zirtirtu pakhat thlaktu dah loa transfer order tihchhuah a nih avangin nimin aṭang khan tiam chin awm loin an khuaa sikul zawng zawng an khâr.

Parva Join Action Committee chuan, Parva H/S zirtirtu (regular teacher) awm chhun V Lalhmangaihzuala chu a aiawhtu tur dah loin sorkarin Lungtian High School-a awm turin transfer order a tihchhuah thu an tarlang a, "Hriatthiam har kan tih hle a, a rang thei ang bera transfer order sût turin sorkar thuneitu kan ngen," an ti.

V Lalhmangaihzuala chu kum tam tak hnua regular teacher an neih chhun a nih thu sawiin Parva JAC chuan, "Transfer a ni hi khawtlang hruaitute'n kan pawm lo a, transfer order sût a nih hma chu kan khua a chhuahsan lohna turin dan kan tum," an ti a; Parva H/S chauh ni loin, an khuaa zirna-in zawng zawng tiam chin awm loa an khâr thu an tarlang.

Parva JAC chuan, Parva H/S chu an khua bakah chhehvel khuate tana high school awm chhun a nih thu an sawi a, "Sorkar school ni chungin ngaihsak kan hlawh ngai lo. Kum tin zirtirtu kim loin session tawp thlengin sikul an kal ṭhin a, naupangte'n harsatna an tâwk nasa ṭhin. Zirtirtu indaih loh chungchang hi pawl hrang hrangte'n sorkar thuneitute hnenah vawi tam tak kan thlen ṭhin a, hmalakna a awm ngai lo," an ti.

Parva JAC tarlan danin, Parva H/S-ah hian V Lalhmangaihzuala hi regular teacher awm chhun a ni a, middle school aṭangin Chakma pahnih dah (attach) a ni. V Lalhmangaihzuala sawn chhuah a nih chuan high school zirtirtu pawh ni lo pahnih chiah an awm dawn. Headmaster chu Chawngtea awm a ni a, sikul a kal ngai lo a; District Education Officer hnanah thlen ṭhin mah se, hmalakna a awm ngai lo a, khawtlang hruaitute'n tihngaihna an hre tawh lo.

V Lalhmangaihzuala transfer order tihchhuah a nih chu thingtlang mite zirna ngaihsak lohna leh inhmuhsitnaa an ngaih thu sawiin Parva JAC chuan, "A rang thei ang bera transfer order sût turin kan ngen a ni," an ti.