Air India thlawhtheihna a tla, chuangte an thi vek

Air India thlawhtheihna flight AI-171, Boeing 787-8 Dreamliner chu nimin chawhnu dar 1:38 khan Ahmedabad airport aṭanga a thlawh chhuah hnu lawkah Meghaninagar bulah a tla a, a kâng nghal. Thlawhtheihnaa chuang mi 242 an thi vek niin police-te'n an sawi. Thlawhnaa chuang zingah Zo hnahthlak nula pakhat a tela sawi a ni.

Thlawhtheihna hi London pan tur a ni a; mi 242 an chuang a, chu'ng zinga 12 chu thawktu (pilot leh cabin crew)-te niin, 230 chu khualzin an ni. India mi 169, British mi 53, Portugal mi pasarih leh Canada mi pakhat an chuang.

Directorate General of Civil Aviation (DGCA) chuan thlawhna hi airport perimeter pawn mai, ft. 825-a sanga a thlawh laiin a chesual tih an tarlang a; BJ Medical College UG hostel building-ah tlain, hostel pawh a kang chhe nasa hle. Hostel-a awm mi panga an thi tih tarlan a ni bawk.

Air India thlawhtheihna chesual taah hian thawktu (cabin crew) zingah Zo hnahthlak nula Lamnunthem Singson a tel thu Kuki media hrang hrangte chuan an tarlang. An tarlan danin, Lamnunthem Singson hi Manipur lam mi a ni a, a nu leh pate chu Manipur buaina avangin Kangpokpi-ah an chêng mek a ni.

Thlawhtheihna chesuala cabin crew zingah Manipuri mi (Meitei) Nganthoi Sharma Khongbrailatpam a tel bawk.