Green Mizoram Day 2025 hman a ni
Nimin khan district khawpui leh hmun hrang hrangah Green Mizoram Day hman a ni a; district hrang hrangin an district-a kângmei veng ṭha khuate hnenah lawmman an hlan.
Aizawlah chuan Mizoram Pollution Control Board (MPCB) bultumin Zokhawsanga 34th Assam Rifles hmunah Green Mizoram Day hman a ni a, thing ṭiak 1,000 vel phun a ni. MLA Baryl Vanneihsangi'n a hmanpui a; environment venhim kawnga inzirtirna leh ram kâng ven kawnga t ṭṭha khuate hnenah lawmman sem a ni.
Baryl Vanneihsangi chuan, a kum têlin tui a harsa chho zel sawiin, "A thlawna kan dawn ruahtui khawlah ṭan kan lak nasat a ngai. Ruahtui khawlna ṭha ber chu ramngaw a ni a, kan ramngaw neih sate hi tihchereu loin humhalh ṭha i la, thing hi i phun uar zual zel ang u," a ti a; thing phunna hmun thlan thiam a ṭul thu leh thing phun tawh enkawl zuiah ṭan lak a ṭul thu a sawi.
Assam Rifles 23rd Sector DIG Brig. Puspendar Sorayan pawhin thu sawiin, Green Mizoram Day puala Zokhawsanga thing ṭiak 1,000 phun a ni tur chu a lawm thu leh duat taka an enkawl zui tur thu a sawi a, "Mizoram sorkarin a ram leh mipui tana a hmalakna reng rengah AR 23 Sector chuan puibâwm turin kan inpeih reng a ni," a ti.
MPCB chuan Green Mizoram Day-ah hian kum danga an tih ṭhin angin thing phun tur ṭhahnem tak an la khâwm leh a, sikul leh college hrang hranga eco club-te phun turin an sem. Aizawl hmun hrang hranga lirthei khu endikna hmunahte thing an phun bawk a, nilêngin an pisa leh a chhehvêl tifaiin an hnatlang bawk.
LUNGLEI DISTRICT
Lungleia sorkar department, zirna-in leh pawl hrang hrang 56 chuan Green Mizoram Day pualin Lunglei tui lâkna hnar Pukpui ram chhunga Tlawng leh Pialthleng panna kawngpui sirah thing 1,200 vel an phun a, Lunglei High Powered Committee (HPC) vice chairman V Malsawmtluanga'n a hmanpui.
V Malsawmtluanga chuan, thing phun enkawl zui lamah ṭan lak a ngaih thu sawiin, "Kristian nihna chu nungcha leh thing leh mau humhalhna kawngah lan chhuahtir a pawimawh a, Pathianin a thil siam nungcha leh thing leh maute a ngaih pawimawh anga ngaih pawimawh leh humhalh hna thawh chu Pathian leh mahni mihringpui tana rawngbawlna a ni," a ti.
SIAHA DISTRICT
Siahaah chuan MADC Forest Hall-ah District Committee on Green Mizoram leh District Hub for Empowerment of Women, Women & Child Development huaihawtin Green Mizoram Day hman a ni a; Ministry of Housing and Urban Affairs ruahman angin AMRUT Mitra (AMRUT leh DAY NULM ṭangkawp) hnuaia ‘Women for Trees’ campaign neih a ni.
CHAMPHAI DISTRICT
Champhaiah chuan additional DC Zorammuana kaihhruaiin Conservator of Forest Auditorium-ah Green Mizoram Day hmanna inkhawm neih a ni. K Zorammuana chuan, "Kumin Green Mizoram Day thupui hi kan thinlungah vawng reng ila, thing phun uar sauh sauh ang u," a ti.
KOLASIB DISTRICT
Kolasib-ah chuan Thingdawl community hall-ah Assembly deputy speaker Lalfamkima, bialtu MLA hoin hman a ni. Lalfamkima chuan, ramngaw humhalh leh thing phun chu rei tawh kalpui a ni tawh tih sawiin, "Rah ṭha tam tak hmuh theihin a awm a, amaherawhchu, awmze nei zawka kan kalpui a ṭul. Kan ramin a ngeih tur thing thlan thiam a pawimawh a, mithiam zawkte aṭanga thurâwn lak a pawimawh tak zet," a ti.
LAWNGTLAI DISTRICT
Lawngtlaiah chuan DC Office tualah bawrhsap Cheemala Siva Gopal Reddy hoin Green Mizoram Day hman a ni. Bawrhsap chuan, hmasawnna hnathawh hrang hrang vang te, lo hâl leh ram tihkan vangitein kum tin ram zau tak tihchereu a nih ṭhin thu a sawi a, "Ram nuam leh hrisel zawk siam tur chuan ramngaw kan neih ṭhat a pawimawh," a ti.
MAMIT DISTRICT
Mamitah chuan district bawrhsap K Laltlawmlova hoin LAD Conference Hall-ah Green Mizoram Day 2025 hman a ni. Kângmei vennaa thawk ṭha khaw pathhum hnenah lawmman hlan a ni a, Mamit Vaisam Park-ah thing ṭiak ṭhahnem tak phun a ni bawk.
SAITUAL DISTRICT
Saitualah chuan DC Bangla kawtah bawrhsap Dr Lalngura Tlau hoin hman a ni. Bawrhsap chuan, kumina Green Mizoram Day thupui chu 'Ruahtui khawl nan thing i phun ang u’ tih a nih thu sawiin, "Kan ruahtui dawnte leh kan tuihna awm sate humhalh nan thing phun uar a pawimawh," a ti.
KHAWZAWL DISTRICT
Khawzawlah chuan Tuisenphai pengṭhuamah Green Mizoram Day hman a ni a, bawrhsap K Vanlalṭhiana'n hmanpuiin, Green Mizoram Day chu ram leh hnam, khawtlang leh an district-a ṭhangthar leh tu leh fate chenna tlaka siam nan hmang tur leh, thing phun kawngah theihtawp chhuah turin district mipui a chah.
HNAHTHIAL DISTRICT
Hnahthialah chuan Green Mizoram Day pualin Vawkpuilutar leh Thiltlang inkarah sorkar department hrang hrangin thing an phun a, district bawrhsap K Vanlalruati'n a hmanpui. Bawrhsap hian tu leh fate tan zirtirtu ṭha ni ṭheuh turin kalkhawmte a chah a ni.
HMUN DANG
Green Mizoram Day pual hian NSS, Mizoram chuan hmun hrang hrangah thing phun rûnpui an nei. Aizawla NSS unit-te chuan plantation site - Damdiai leh Hmuifang inkarah thing ṭiak eng emaw zat an phun a, kum hmasa lama thing an phunte enkawlin a hmunhma an tifai a ni.
Sinlung Hills Council (SHC) Headquarters, Sakawrdaiah pawh Sakawrdai SDO (Civil) N Lalzarzova hoin Green Mizoram Day hman a ni a, SHC chairman R Lalfakzuala'n a hmanpui a; Herhse ṭiak 20 leh thing dang 50 an phun. Darlawn DFO PC Lalṭanpuia tarlan danin, Green Mizoram Day 2024 pualin Darlawn Forest Division huam chhungah thing ṭiak 435 phun a ni a, thing phun tur 12,919 sem a ni.