Mi 10 hnenah puantah ṭanpuina sem

Commerce & Industry department chuan nimin khan Thingsulthliah Diakkawn YMA Hall-ah National Handloom Development hnuaia puantahtute puantahna in sakna tur ṭanpuina an sem a; bialtu MLA Prof. Lalnilawma, minister of state-in hmanpuiin, mi 10 hnenah ṭanpuina first instalment Rs 60,000 ṭheuh a hlan.

Prof. Lalnilawma chuan, ṭanpuina dawngtute chu an pawisa dawnte a hmanna tur dik takah hmang turin a chah a, "Puantah hi eizawnna tlak, chhungkaw châwmna tlak a ni a, ṭanpuina in dawn hmang hian sum tam tak in thawk chhuak thei. Eng hna pawh thawk ila, hlawhtling tur chuan beidawng loa tih tak tak a ngai a, sorkarin ṭanpuina min pek hi hmang ṭangkai ila, hlawhtling ngei turin tih tak zetin hma kan lak chhunzawm a ṭul," a ti.

India ram bakah, khawvel hmun hrang hrangah Mizo kutchhuak puan thawn chhuah ṭhin a nih thu sawiin Minister chuan, puantah chu mipa tan pawh eizawnna tlak a nih thu a sawi bawk.

Ministry of Textiles kaltlangin Thingsulthliah cluster-a puantahtu mi 50 hnena pek tur ṭanpuina sum hmuh a ni a, first instalment aṭangin mi 10 hnenah puantahna in sakna tur Rs 60,000 ṭheuh pek niin, puantah khawl pek leh an ni ang. Mi dang 40-te chu second instalment hmuh hunah ṭanpuina pek tum a ni.