Zohmunah sikul kai tur dan tumna ṭhulh

Zohmun NGO Coordination Committee-in Zohmun High School-a Science leh Mathematics zirtirtu dah tura sorkar karna atana June 9, nimin aṭanga sikul kai tur dan an tum chu an ṭhulh rih a; June 13, 2025 thleng sorkar ngaihchàn an tum.

Zohmun NGOCC chuan, nimin aṭanga Zohmun H/S zirlai leh zirtirtu sikul kai tur dan an tum chu sorkar thuneitute aṭangin chawlhkar khat chhung ngaichâng tura an ngen avangin an ṭhulh rih tih an tarlang a; "Kar khat chhung a ngaichâng dawn a, June 13, Zirtawpni ral hma ngeia Science leh Mathematics zirtirtu dah a nih loh chuan June 14, Inrinni hian lungawi lohna kawngzawh a ni ang," an ti.

Kawngzawh huaihawt a nih hnu pawha zirtirtu dah a nih loh zel chuan June 16, 2025 aṭangin tiam chin awm loin sikul kai tur an dang dawn tih an tarlang bawk.

Zohmun NGOCC chuan, Zohmun H/S-ah hian zirtirtu an neih loh avangin tun academic session kal mekah sikul ṭan ni aṭangin zirlaite'n Mathematics leh Science subject an la zir lo tih an tarlang a, "Zirlaite hian mark khawl (internal mark) an nei lo a, heng subject-ahte hian an fail sa tihna a ni," an ti.