KHAWTHLIR

Thisen pe

Synod Higher Secondary School NSS chuan nimin khan an sikul multipurpose hall-ah Blood Donation Camp an buatsaih a, Civil Hospital, Aizawl tan thisen unit 221 an pe a, petute mipa 148 leh hmeichhia 73 an ni. Aizawl Civil Hospital Blood Bank-in thisen dah khawl sa an neih tlem avanga thisen pe tura an ngen angin blood donation camp an huaihawt tih Synod HSS hotute chuan an sawi.

Kawng chanve khâr ṭhin dawn

Vanapa Hall bul kawngpui sira tui luankawr siamṭhat hna thawh a nih dawn avangin June 11, Nilaini chawhma dar 10 aṭanga hna thawh zawh hma chu ni tin kawng chanve khâr a nih dawn thu Traffic SP Ruatsanga Ralte chuan a tarlang.

Ruahmanna pawm

Hnahthial bawrhsap K Vanlalruati kaihhruaiin nimin khan District Planning Committee an ṭhu a; India Constitution Article 275(1) Grants-in-Aid hnuaia Hnahthial district-a department pangate proposal thehluh sawihoin, an pawm. Ruahmannate hi state sorkar hnenah thehluh tura ruahman a ni. PM DAJGUA hnuaia bazar sak theihna hmun tura ruahmante chu chiang zawka zir chhian leh turin an dah bawk.

Tanpuina sum pe

Mizoram Rural Bank-a thawk pawl hrang hrang inzawm khawm, Joint Council of MRB Unions chuan tun hnaia khuarel chhiatna thlenga harsatna tâwkte chhawmdawlna atan leh a ṭul anga ṭanpuina hna thawhna atan nimin khan Chief Minister’s Relief Fund-ah Rs 4,50,000 an thawh. Chhiatnaa chhawmdawl hna an thawhna atan Central YMA hnenah Rs 1,00,000 leh Central YLA hnenah Rs 50,000 an pe bawk.

Kawng dinhmun

Lungleia Information & Public Relations Officer chuan nimin khan Lunglei district-a kawngpui hrang hrang dinhmun a tarlang a; ATL Road-a Lunglei-Kanghmun South inkar, NH-54 Dâwn leh Thingfal inkar, NH-54A Lunglei leh Hrangchalkawn inkar, NH-302 Lunglei-Tlabung inkar, Lunglei-Buarpui leh Buarpui-Thenhlum inkar, Phairuangkai-Thenhlum Bolia thleng kawngte a tlang ṭha. Bolia leh Thenhlum inkara kawng metre 28-a thui a bal vangin temporary timber bridge siam tuma hmalak mek a nih thu leh, Thenhlum-Bunghmun inkara kawng bal vangin kawng thar siam mek a nih thu a tarlang bawk.