Tlabungah zirtirtu la dang zui zel

Tlabung High School aṭanga mathematics zirtirtu Mizoram sorkarin a sawn chhuahin Tlabung a chhuahsan loh nan Tlabung khawtlang chuan zirtirtu chhuak tur chhun zan zawmin an la dang chhunzawm zel.

Tarlan tawh angin, Tlabung Joint VC & All NGO Committee hruaitute tun hnaia ṭhukhawm chuan Tlabung H/S-a mathematics zirtirtu Esther Lalhlupuii sawn chhuah tumna an dodal a, June 2, 2025 hma ngeiin transfer order sût turin sorkar an lo phût tawh a ni.

An thil phût sorkarin a tihhlawhtlin loh avangin May 6, 2025 khan Tlabung khawtlang mipuiin zirlaite leh zirtirtute sikul kai tur an dang a, zirtirtu transfer tâkin Tlabung a chhuahsan loh nan an vêng bawk a, tlaivarin vengtu an indah a ni.

Nimin thleng khan sorkar aṭanga an beisei ang thu lawmawm an la dawn loh avangin zirtirtu chhuak tur an la dang zui zel a, thu lawmawm an hmuh hma chu dan an tum. Zirtirtu chhuak tur an dan bakah hian, zirtirtu dang leh zirlaite sikul kai tur pawh an dang bawk.

Tlabung khawtlang hruaitute sawi danin, Modern High School, Lungtiana mathematics zirtirtu chu Aizawlah sawn a ni a, chumi thlakna atan chuan Tlabung H/S-a mathematics zirtirtu chu Lungtiana awm turin transfer order chhuah ve leh a ni.