Jordan Centre, Seṭhawn cheibâwl rawtna CYMA-in CM-ah an thlen

Central YMA hruaitute chuan nimin khan chief minister Lalduhoma a pisaah an kâwm a; ruihhlo ngaite enkawlna atana Seṭhawna Jordan Centre chu cheibâwl rawtna an thlen.

CYMA hruaitute'n Jordan Centre cheibâwl thar an rawt chungchangah hian Chief Minister chuan, sorkarin ruihhlo ngaite enkawlna turah ngaihtuahna a sên mek thu leh Jordan Centre enkawl chungchangah sorkar leh kohhrante an indawr mek thu a lo hrilh.

YMA rorel inkhawma an rêl tawh Mizoram Lokayukta hnuaia Investigation Wing siam chungchangah CYMA hruaitute chuan, The Mizoram Lokayukta Act, 2014 siamṭhat (amendment)-a Investigation tih lai paih tawh chu dah lêt leh turin an ngen a; CM chuan a lo en zui tur thu a sawi.

CYMA hruaitute chuan, March 15, 2025-a Union Home minister Amit Shah lo zin ṭum a sawi, Thingsulthliaha YMA rama conference centre sakna tur cheng vbc 100 dilna leh Narcotics Control Bureau (NCB) kaltlanga ruihhlo dona tur sum dilna thehluh tawh chu bawhzui turin CM an ngen a; Lalduhoma chuan, a lo bawhzui tur thuin a chháng.

Chief Minister chuan, October 2025-a YMA Inkhawmpui Lian neihna tur Sakawrdai leh Mauchar inkar kawng chu chak zawka siam a nih tur thu a lo hrilh bawk.

CM Lalduhoma hmuhnaah hian CYMA president Lalhmachhuana leh office bearer dangte an tel a ni.