Ramri kaltlang dan bawhchhiatna ṭha zawka venhim dan tur sawiho

Nimin khan Mizoram sorkarin ramri kaltlanga dan bawhchhiatna vennaa chak zawka thawktute'n hma an lak theihna tura a din, Mizoram Security Coordination Committee chu an chairman Lalduhoma, chief minister hoin CM conference hall-ah an ṭhukhawm. Ṭhutkhawm vawi khatnaah hian ramri kaltlanga dan bawhchhiatna ṭha zawka ven dan tur sawiho a ni.

Ṭhutkhawmah hian Indisa leh Myanmar ramri leh, India leh Bangladesh ramri dinhmun te, Mizoram leh a ṭhenawm state ramri dinhmun te, ramri paltlanga ruihhlo leh ralthuam tawlhruk chungchangte leh hmalak zel dan tur thil pawimawhte an sawiho.

Meeting-a tarlan danin, Tripura leh Mizoram ramri, New Kawnpui vela Tripura State Rifles-in temporary check post leh sentry shed an siamte chu Chief Secretary leh DGP level-a inbiak a nih hnuah Tripura Rifles-in an hmunhmate tichhiain an kalsan tawh.

Mizoram sualna (crime) record tam ber chu rûkrûk case a ni a, kumtlinglo pawngsual (POCSO Act) bawhchhiatna pawh a tam. NDPS Act hnuaiah nikum chhung khan thubuai 338 ziah luh a ni a, kuminah hian May thlengin thubuai 114 ziah luh a ni tawh.

Kuminah May thla tawp thlengin methphetamine kg. 648.82 man a ni tawh a, cheng vbc. 84 vel hùa chhut a ni a; crystal meth kg 5.169 man a ni tawh a, cheng vbc. 15.5 vel hûa chhut a ni.

Nikum 2024 chhung khan ralthuam leh puak thei thubuai 47 ziah luh niin, mi 56 man an ni a; kuminah May thla tawp thlengin mi 51 man niin, thubuai 34 ziah luh a ni tawh.

Ṭhukhawmah hian Inner Line Permit chungchang te, One Nation One Ration Card anga Manipur aṭanga himna zawnga rawn insawnte'n ration card an neih vekna tur te, international tourist (khualzin) Mizoram tlawh duhte'n permit rang zawka an neih theih dan turte sawiho a ni.

Mizoram Security Coordination Committee-ah hian Home minister K Sapdanga, Excise & Narcotics minister Lalnghinglova Hmar, chief secretary Khilli Ram Meena, DGP Anil Shukla, Mizorama sorkar laipui leh state hnuaia venhimna lam thawktu hrang hranga thuneitu sangte member an ni.