Kawng chhiat avangin Tlabungah ni 20 chhung buhfai an phur lut tawh lo

Tlabung leh Lunglei inkar kawngpui, National Highway no. 302 chhiat vangin Lungleia truck-te an la tlan duh lo zel a, ni 20 chhung an tlan tawh lo.

Lunglei-Tlabung kawng hi a chhiat avangin Lunglei Truck Owners' Association chuan buhfai phura tlànna chi-ah an ngai lo a, October 10, 2016 aṭangin an tlan duh lo ṭan a, tun thlengin an la tlân lo a ni.

LTOA hruaitute chuan, Sup-ply department leh khaw ṭhen-
khat aṭangin ngenna dawng mah se, NH-302 chu lirthei rit phur tlàn theih turin thawm ṭhat a la ni lo tih an sawi a; an member zingah buhfai phur duhte an awm chuan an indan loh tur thu sawi mah se, tun thlengin tlan duh an la awm lo tih sawiin, "Kan indang lui lo a, buhfai phur peih an awm phawt chuan a tlàn theih reng tih pawh kan sawi.Mahse, tlân ngam kan awm lo a ni ber mai," an ti.

Truck-te hian ṭum khatah buhfai quintal 130 an phur tlangpui a, mahse, tun hnai khan kawng enkawltute chuan qtl. 90 aia rit phur lirthei tan kawng zawh an khap. Tlabunga Supply kudamah November thla chawhma daih tur buhfai quintal 800 vel a la awm nia thu dawn a ni.

Hetih lai hian, October 22, 2016-a Mualkhang Bottling Plant aṭanga truck-in Tlabunga dah tur eirawngbàwlna gas cylinder 306 a phurh chu nimin thleng khan Tlabung a la thlenpui lo. Tlabunga Zomawi Gas Agency neitute chuan, kawng a chhiat avangin Tlabungah gas an la phur thleng ngam lo niin an sawi.

Lunglei-Tlabung kawng chhiat thu hi Mizo Students' Union, Tlabung chuan, Prime Minister's Office-ah October 15, 2016 khan an thlen a; October 25 khan West Tuipui bialtu MLA Nihar Kanti Chakma chuan Road, Transport and Highway minister Nitin Gadkari hnenah a thlen tawh bakah, Tlabung MZP-te pawhin October 28 khan Mizoram Governor hnenah an thlen bawk.