Kolasib dist.-ah khaw 20-ah Ziak leh chhiar an thiam vek

Mizoram sorkar chuan thuchhuah siamin, Kolasib district chhungah ziak leh chhiar thiam lo awm lohna khuaa puan theih khaw 20 a awm thu a tarlang.

Sorkar thuchhuah tarlan danin, Kolasib district mipuiiin ziak leh chhiar an thiam vek theih nan leh zirnain hma a sawn theih nan Kolasib DC hoin October 2015 aṭangin hmalak ṭan a ni. Ziak leh chhiar thiam lote'n an thiam theih nan MGNREGS nena thawk dunin, job card nei ziak leh chhiar thiam lote zirtirna pek a ni a, an zirna hmanrua tur SSA leh RMSA-in an tum.

Zirnain hma a sawn zel theih nan Kolasib Officers Club huaihawtin sikul hrang hrangah education campaign an nei ṭhin a, kumin Teacher’s Day-ah khan district-a official awmte'n anmahni sensoin khaw hrang hrangah zirna tih hmasawn nan kalin, khawtlang hruaitu te, nu leh pa te, zirtirtute leh zirlaite fuihna hun an hmang a ni.