Bawlhhlawh sâwngbâwl dan sawiho

Mizoram State Sanitation Task Force (MSSTF) chuan, tun hnai khan Tuirial Dumping Ground-ah bawlhhlawh paihna changkang leh chang-tlung zawk siam tura hmalak mek an sawiho.

Meeting kaihruaitu, UDPA secretary Dr C Vanlalramsanga chuan, Tuirial Dumping Ground thlakna tur changkang leh mihring leh boruak tana hrisel zawk Aizawl Municipal Solid Waste Resource Management System, SIPMIU-in a kalpui mek a sawifiah a, "MSSTF hi NEDP hnuai-a climate change lama hmalakna tur a ni a, a component tihpuitlinna tur a ni," a ti.

SIPMIU project director Valbuanga chuan, bawlhhlawhte thianghlim taka sawngbawlna hmun tur New Engineered Sanitary Landfill chak taka siam a ni tih sawiin, "Aizawl khawpuia in tinah bawlhhlawhte a
ṭawih thei leh ṭawih thei loa thliarna tur chhung-kaw 71,438 hnenah bawlh-hlawh báwm pa-hnih theuh sem a ni tawh," a ti a; bawlhhlawh thliar hran sate lâk khawmna tur colour coded gar-
bage vehicle 54 pawh kum 2017-a hman theih tura ruahmanna a nih thu a sawi.

Meeting-a tarlan dan-in, New Engineered Sanitary Landfill-ah hian bawlhhlawh ṭawih thei
aṭanga leiṭha siamna hmun, ni tin ton 22 sawngbawl theihna, Vermi Compost Plant leh ni tin ton 50 sawngbawlna Mechanical Compost Plant siam hna thawh mek a ni. Bawlhhlawh ṭawih thei lote ni tin ton 74 recycle/resell/reuse leh tura sawngbawlna hmun Dry Waste Resource Centre pahnih Industrial Growth Centre-ah siam a ni bawk.

Bawlhhlawh hman tlak tawh lote thianghlim taka phûm bona hmun Engineered Sanitary Landfill pawh SIPMIU chuan an siam mek a; hei hi kum 25 chhung hman theih tur niin, hman theih a nih hun kum 2018 aṭangin Tuirial Dumping Ground chu thenfaia khâr nghal tum a ni.