MNF-in sumdawnna lirtheite tlan theih kum bithliah sût an phût

MNF party chuan, Mizoram sorkarin sumdawnna lirtheite tlan theih hun chhung kum a bithliah chu sût turin an phût a; sut a nih loh chuan lirtheia eizawngte thlavang hauhin hma an lak zel dawn thu an puang.

MNF vice president leh MNF Vigilance department-a chairman R Tlanghmingthanga chuan Inrinni khan Aizawl Press Club-ah thuthar thehdarhtute kâwmin, "Kan sorkar hrawn mek hian lirtheia eizawngte tan thupek nunrâwng tak tak a chhuah fo a, lirtheia eizawngte'n sorkar thu leh hla an sepui ruah tawrh ṭhin... Lirthei hmanga eizawngte sawisak leh tawrhna hi MNF party chuan en liam chi niin kan ngai lo a, a rang thei ang bera dan nunrawng tak a siam hi sût nghal turin kan phût a ni," a ti.

R Tlanghmingthanga chuan, July 26, 2016-a State Transport Autority (STA) thurel anga sorkarin September 15-ah notification chhuaha sumdawnna lirtheite tlan theih hun kum bithliah a ni chu ṭha lo an tih thu a sawi.

MNF Vice President sawi danin, sumdawnna lirtheite tlan theih hun kum bithliah chu - tourist bus kum 8; tourist taxi kum 9; two wheeler taxi, auto-rickshaw, local taxi, maxicab leh city/town/line/bazar bus-te kum 10 tih a ni. Eizawn nana hman lirtheite chu kum bithliaha upa a nih tawh chuan a thara thlak tur a ni a; motor thara thlak nan thla ruk chhung hun pek niin, bus bik tan thla riat hun pek a ni.

Tlanghmingthanga chuan, sumdawnna lirtheite chu service tura a ṭhat tawk leh ṭhat loh endiktu tur chu MVI-te an nih thu leh MV Act-ah lirthei atana hman theih dante chiang taka a inziah thu sawiin, sorkarin kum a bithliah chhan a tarlan - mipuite himna tur tih chu chhuanlam tling lo niin a sawi a, "Sorkar hian road tax kum 15 chhung atan an la sauh sauh a, kum 8/10 bak tlan thei lo tura a ti leh si hi rorelna mak leh runthlâk ber, lirtheia eizawngtute rawkna dik tak a ni," a ti.

Tlanghmingthanga chuan, "Kum 2013-a ITI-in bus leina tur sum an pek vek tawh tun thlenga an la supply theih loh lai leh Health department-in truck leh gypsy eng emaw zat pawisa pek hnu pawha an la supply thei lo a ni," a ti a; sorkarin a order chu kaltlangpui se, sumdawnna lirthei kum 8/10 pêl tawhte a thara thlak turin Mizorama motor company dealer-te'n thla 6/8 chhungin an pek hman vek a rinawm loh thu a sawi.

MNG general secretary L Thangmawia chuan, Mizorama lirtheia chetsualna thleng zinga tam zawk chu a khalhtute ruih vang tia sawi ṭhin a nih thu sawiin, "Lirthei a hlui tawh vangin chetsualna a thleng tam tih sawi a awm ngai mang lo. Lirthei hlui tawh a him lo tih ngawt hi finfiahna a awm lo a, chhuanlam tling a ni lo," a ti.

Vehicle life time tax lak chungchangah MNF Vice President chuan, Mizoram sorkar hotute'n sorkar laipui thupek vangin loh theih loha kum 15 chhung atan lak a ngaih thu an sawi laiin, a hnuah life time tax lak dan chu an tidanglam leh thei tho tih a sawi a; sumdawnna lirthei tlan theih hun kum bithliah chu kaltlangpui a nih chuan, kum 15 atana tax pe tawhte hnenah an sum pek tawh pek kîr leh an phût tih a sawi bawk.