HIV/AID veite tan 'láwm rawih zan'

CZ Foundation chuan Inrinni zan khan Lal Thanhawla Auditorium-ah HIV/AIDS veite ṭanpuina tur tuakna atan ‘Láwm rawih zan’ an buatsaih a, Health minister Lal Thanzara'n a hmanpui. Health Minister hian a ṭula hman atan CZ Foundation hnenah Rs. 50,000 a pe.

Health Minister chuan, CZ Foun-dation-in HIV /AIDS darh zau zel tur venna leh a vei mekte'n harsatna an tawh lohna tura ṭhahnemngaia hna an thawh dan leh People’s Living with HIV-te nena an hmalakna chu hlu a tih thu a sawi a, "HIV hian kan ram hi min luhchilh nasat tawh avangin a hlauhawm dan leh a pawizia hi mi tinin an hriat theih nan puanzar a ṭul. A remchang lai khawi hmunah pawh beihpui thlâk a ngai tak zet tawh a ni," a ti.

Lal Thanzara chuan, HIV/AIDS inkai darh dan chu puanhnuai thil leh mi hmuh loh tur lai zawnga a rûka tih ṭhin a nih avangin pawngpaw do ngawt a harsa tih sawiin, "A vei leh kai zingah mi pangngai anga ngaih kohhran ṭhalai member ṭhenkhatte ngei pawh an tel tih hmuhchhuah a ni," a ti a; HIV/AIDS a darh zel tur veng turin sorkar, kohhran, tlawmngai pawl leh mimal ṭanrual a ngaih thu a sawi.

Inkhawmah hian HIV/AIDS chung-chang tarlanna lemchan, 'Ka nu lehkha' tih chu MSACS project director Dr Lalmalsawmi Sailo-in a tlangzarh a; CZ Foundation general secretary Lalawmpuia'n an pawl kalphung leh hnathawh dan a sawifiah.