Vanglaini chhui zauna Ni 51 chhungin stamp duty Rs. 7,72,365 la LRS dept-in stamp vendor nih an inhre lo

Mizoram sorkara Land Revenue & Settlement (LRS) department chuan, dan thar hmanga stamp duty a tihsan hnua dan a suspend leh hma ni 51 chhungin mi 57 hnen aṭangin stamp duty aṭangin Rs. 7,72,365 a la hman. Hetih lai hian, LRS department chuan stamp vendor atana sorkarin a ruat tih an inhre lo.

Vanglaini-in RTI Act hmanga stamp duty chungchang a zawhna, LRS department SPIO-in a chhan danin, The Indian Stamp (Mizoram Amendment) Act 2016 chu September 1, 2016-ah hman ṭan a ni. Dan thar hman ṭan a nih tur thu hi LRS department secretary Zothankhuma'n August 2, 2016-ah gazette-ah a chhuah a, September 1-ah hman ṭan a ni. RTI Act hmanga zawhna hi October 7, 2016-ah thehluh a ni a, chhanna hian October 21 thleng a huam.

Stamp duty lak a nih dawnah The India Stamp (Mizoram Amendment) Act 2016-in rules a neih leh neih loh zawhna chu, 'Land Revenue & Settlement department-in stamp duty a lak dawnin rules a nei lo,' tiin an chhang. Stamp duty chu Government of Mizoram Allocation of Business Rules 2014, Notification no A.46013/1/2013- GAD dt. 17.2.2015 hmangin LRS department hnenah hlan chhawn a ni a, Mizoram Stamp Rules 2016 tihchhuah (publish) a nih hma zawng pawhin stamp duty lak reng a ni," an ti.

Stamp duty tihsan hnu, ram hlutna
aṭanga 2% lak hi Aizawl district leh Lunglei district-ah chiah tih hman a ni a; district dang zawngah chhanna hmuh tel a ni lo.

Stamp duty lak dan hi chi li tarlan a ni a; chungte chu - mortgage deed (bank-a LSC dahkham), sale deed (ram leina), gift deed (ram inpekna) leh conveyance-te a ni.

Stamp duty 2% lak chhung hian Aizawl district-ah mi 40-in an pe hman a, a zavaiin Rs. 5,59,705 a ni. Lunglei district-ah mi 17-in an pe hman a, an pek belhkhawm chu Rs. 2,12,660 a ni.

Aizawl leh Lunglei district-a ni 51 chhunga stamp duty 2% lak chhung hian Mizoram sorkar chuan Rs. 7,72,365 a la hman. A chawi tam berin Rs. 80,275 a chawi a, a chawi tlem berin Rs. 200 a chawi thung.

Aizawl district-ah chuan mortgage deed bikah mi 22 aṭangin stamp duty Rs. 3,92,600 lak a ni a, gift deed-ah mi 16 aṭangin Rs. 1,23,780, sale deed-ah mi pali aṭangin Rs. 43,325 lak hman a ni. A chawi tam ber chuan gift deed-ah ram man (market value) Rs. 4,013,750 aṭangin Rs. 80,275 a chawi a, mortgage deed-ah mi pakhatin ram man Rs. 4,000,000 aṭangin Rs. 80,000 a chawi bawk.

Lunglei district-ah chuan a chawi tam berin mortgage deed-ah ram man chhût chhuah Rs. 3,000,000 aṭangin Rs. 60,000 a chawi a, mi dang pakhat chuan conveyance-ah ram man Rs. 2,560,000 aṭangin Rs. 51,000 a chawi.

Lunglei district-ah hian mortgage deed-ah mi pasarih aṭangin stamp duty Rs. 1,15,400 lak a ni a, sale deed-ah mi pali aṭangin Rs. 13,300, gift deed-ah mi pathum aṭangin Rs. 16,320 leh conveyance-ah mi pathum
aṭangin Rs. 67,640 lak a ni.

Stamp duty hman ṭan leh dan siam ṭhat a nih dan zawhna an chhan danin, stamp duty chu India ram pumah kum 1860-ah The Indian Stamp Act 1860 hmangin lak ṭan a ni a; dan chu a hnu kum 1862, 1869 leh 1879-ahte tihdanglam a nih hnuah, tuna dân ding lai The India Stamp Act 1899 chu hman a ni.

Mizoram bikah chuan, The India Stamp (Mizoram Amendment) Act 1973 (Act no. 3 of 1973) te, The India Stamp (Mizoram Amendment) Act 1996 (Act no. 4 of 1977) te, The India Stamp Stamp (Mizoram Amendment) Amending Act 2007 (Act no. 11 of 2007) leh, The India Stamp (Mizoram Amendment) Act 2016 hmangin stamp duty chu lak a ni.

Sorkarin stamp vendor atana LRS deparment a ruat chungchang zawhna chu SPIO chuan an hriat loh thuin a chháng a, "Stamp duty chungchang hi Notification no A.46022/1/2011- REV st 19.9.2013 hmanga Directorate of Registration and Stamp-in a khawih ve ṭan chauh avangin sorkarin tute nge stamp vendor atan a ruat he Directorate hian a hre lo," a ti.