Zirtirtu dah phûtin sikul kai tur dang dawn

Zohmun NGO Coordination Committee chuan, Zohmun High School-ah June 13, 2025 hmaa mathematics leh science zirtirtu dah phûtin June 9, Thawhṭanni khian zirtirtu leh zirlaite sikul kai tur an dang dawn.

YMA, MHIP leh MUP bakah, zirlai nu leh pate telna Zohmun NGO Coordination Committee chu June 4, 2025 zana ṭhukhawm chuan Zohmun H/S-a science leh mathematics zirtirtu awm loh vanga zirlaite'n harsatna an tawh chungchang an ngaihtuah a; June 9, 2025-ah zirtirtu leh zirlaite sikul kai tur dan an rêl a ni.

NGO Coordination Committee chuan, "Zohmun H/S-ah June 13, 2025 hma ngeia mathematics leh science teacher min pek ngei kan phût tlat a ni tih lantir nan June 9, Thawhṭanni hian zirtirtu leh zirlaite sikul kal tur kan dang (boycott) dawn. Kan thil phût min tihhlawhtlinsak turin sorkar leh thuneitute kan ngen a, kan hlawhtlin hma loh chu kan tu leh fa, zirlai naupangte tan theihtawp kan chhuah zel dawn a ni," an ti.

Zohmun NGO Coordination Committee tarlan danin, Zohmun H/S-ah mathematics leh science zirtirtu hun rei tak an nei tawh lo a, khawtlang hruaitute'n sorkar leh department thuneitute hnenah vawi tam tak thlen tawh mah se, tun thlengin dah a la ni lo. Zirtirtu an neih loh avang hian tuna academic session kal mekah zirlaite'n science leh mathematics subject an la zir lo a ni.