Mamit district-ah Nari Adalat hawn a ni

Village council huam chhunga hmeichhiate thubuai remna tura duan Nari Adalat chu June 5, Ningani khan Mamit bawrhsap K Laltlawmlova'n DC conference hall-ah a hawng.

Nari Adalat hi India rama district thlan bikah chauh hman tura duan a ni rih a; K Laltlawmlova chuan, Mizoramah Mamit district-a Nari Adalat hawn hmasak ber a ni ta chu hmeichhiate dinhmun chawi kânna ni chhinchhiah tlak a nih thu a sawi a, "Sorkarin hmeichhiate dâwm kân nan scheme tam tak a neihte hi hman ṭangkai a ṭul," a ti.

Women & Child Development director Zoramthangi Chhangte chuan, Mamit district chu Aspirational District a nih angin Nari Adalat kalpuina atan thlan a nih thu a sawi a; hmeichhiate'n harsatna an tawhte rorelna sang zawk pan kher loa VC china chinfel theihna tur a nih thu a sawi bawk.

Nari Adalat hi Women & Child Development, Mission Shakti Scheme (Sambal) hnuaia kalpui tura duan niin, kum 2023 khan Ministry of Women & Child Development hnuaiah din a ni a; Mamit district-a khaw 10 - New West Phaileng, Lallen, Damparengpui-I, Zawlnuam Vengpui, Kanhmun, Kawrthah South, Reiek, Rawpuichhip, Kanghmun, Rajiv Nagar I-ah din a ni.

Nari Adalat member atan VC member, khawtlang tana mi pawimawh leh rintlak, hmeichhe zirtirtu, MHIP aiawh, SHG aiawh, anganwadi worker leh YMA emaw NGO dang aṭangin member pakhat ṭheuh ruat a ni.