Ruihhlo ngai enkawlna home/centre enkawltute pualin training buatsaih

Mizoram Social Defence & Rehabilitation Board leh Working Committee on Ruihhlo Do chuan nimin khan MSDRB training hall-ah Aizawl district-a ruihhlo ngaite enkawlna home/centre enkawltute pualin ‘Training Programme on Accreditation for NGOs of Aizawl Disctrict’ an buatsaih a; Mizoram Youth Commission leh Core Committee on Hulhliap Short Stay Centre chairman Malsawmzuala Ralte-in a hmanpui.

Malsawmzuala Ralte chuan, home/centre-te'n ruihhlo ngaite enkawlnaa thâ an thawh tawhna chu ropui a tih thu a sawi a, "Tunlai boruakin sorkar, kohhran, NGO leh mimal tin ruihhlo ngaite enkawlna kawngah min béng harh. Ruihhlo ngai tam tak, enkawlna mumal dawng loa khawlaia awmte'n enkawlna an dawn theih nan MYC leh Social Welfare department thawhhona hnuaia Hulhliap Short Stay Centre din a ni dawn a, ruihhlo ngaite'n an ṭangkaipui ngei ka beisei," a ti.

Training hawnna inkhawm hi Social Welfare joint secretary Zonunthari'n a kaihruai a, director Dr Lalhriatzuali Ralte pawhin thu a sawi. Aizawl district-a ruihhlo ngaite enkawlna home/centre 22 aiawhte an tel a ni.

Tarlan danin, Mizoram Drug (Controlled substance) Act, 2016 Section 42-in a phût angin Mizorama ruihhlo ngaite enkawl leh buaipui lam kaihhnawih home/centre dintute'n Social Welfare department hnuaiah dan angin sorkarah an inziah luh a, accreditation an neih vek ngai tawh dawn. Accreditation atana hriattirna pawh home/centre hrang hrangah pek chhuah tawh a ni.