Minister-in VC-te dinhmun tarlanna PAI 1.0 Report Card a tlangzarh

Rural Development and Administration minister Prof. Lalnilawma chuan nimin khan a pisaah Localisation of Sustainable Development Goals (LSDGs) theme pakua tihhlawhtlin kawnga village council-te dinhmun leh thlen chin tarlanna, Panchayat Advancement Index (PAI) 1.0 Report Card a tlangzarh.

PAI 1.0-ah hian zir chian kum chu 2022-23 niin, VC 834 dinhmun zir chian a ni a; tunah hian PAI 2.0 (2023-24) atan hmalak leh mek a ni. PAI 1.0-ah hian mandatory indicator 384 leh optional indicator 124 hman a ni a, a vaiin indicator 508 a ni.

PAI 1.0 Report Card-a tarlan danin, Mamit district-a Suarhliap VC chuan 68.89% hmuin, Mizorama hmu sang ber a ni a, Lawngtlai district-a Fulsora VC chuan 38.04% hmuin, hniam ber a ni.

Prof. Lalnilawma chuan, PAI Report Card chu ram hmasawn dan dinhmun tarlanna darthlalang pawimawh a nih thu a sawi a, "Ram hmasawnna atan VC-te'n sorkar hmalaknate theihtawpa an thlâwp a ṭul," a ti.

Minister chuan, PAI 2.0-ah report card ṭha zawk neih a nih theih nan leh National Panchayat Award lawmman la phak turin department leh VC tinte chu sorkar hmalakna hrang hrang ngai pawimawh lehzual turin a chah a; data ṭha leh rintlak nei a, report felfai a hun takah buatsaiha thehlut zel turin a chah bawk.

PAI chungchang sawifiahtu Local Administration director Chuauhnuna sawi danin, PAI Report Card hi khaw tinte LSDGs tihhlawhtlinna tura an dinhmun leh thlen chin hriatna a ni a; khaw tin tana hmasawnna tur ruahmanna thar siam nan leh VC-te'n National Panchayat Award an lak theihna tura kawng pawimawh a ni.