KHAWTHLIR

Thisen pe

Brilliant Higher Secondary School, Serchhip chuan nimin khan Serchhip District Hospital tan thisen unit 22 an pe a, petute mipa 17 leh hmeichhia panga an ni. Serchhip College-a Combined Annual Training Camp-31 nei mek National Cadet Corps (NCC) 1 Mizo Air Squadron pawhin June 5, Ningani khan Serchhip District Hospital tan thisen unit 18 an pe bawk.

Milk Day pual

College of Veterinary Sciences & Animal Husbandry, Central Agricultural University, Selesih chuan World Milk Day (June 1) pualin nimin khan Selesih Primary School leh Middle School-ah hun an hmang. Vety College-a Department of Livestock Products Technology-a thawktute'n bawng­hnute pawimawhna leh thianghlim taka bawnghnute sawngbawl dante an zirtir a; bawnghnute hmanga ei tur siamte an chhawp bawk.

PUC Grad Dinner

Pachhunga University College chuan kumina an zirlai chhuak turte pualin nimin khan PUC multipurpose hall-ah Grad Dinner an buatsaih a, principal Prof. H Lalthanzara'n zirlai chhuak turte fuihna thu a sawi. Kuminah hian PUC hian zirlai chhuak tur zirlai 707 an nei a, BA 433, BSc 205, B.Com 48 leh BBA 21 an ni.

Chetsualnaah thi

June 5, Ningani zing dar 8:30 vel khan Nginsiamthanga (21), Ngúr khua chu Keifang daiah truck-in kawng chhak lam lung bangah a nêk beh avangin a thi. Nginsiamthanga hi a truck khalh ke kawng chhak lam tui luankawrah a tlak avangin lirthei aṭangin a chhuk a, handyman khalhtirin, kawng chhak lam a lo endik a ni. Truck ke hnung lam tui luankawrah tla lut lehin, truck-in lung bangah a nêk bet a, lak chhuah a nih chuan a lo thi tawh a ni.

Project sawiho

Serchhip District Planning Committee chu nimin khan district bawrhsap Paul L Khuma hoin an ṭhu a; department hrang hrangte'n district hmasawnna tura project an siamte thlirhoin, project ngaih pawimawh zual bik turte an thlang. Project an thlante chu DPR siam turin department-te an hriattir bawk. Project-te chu DC Office-in Planning department pawmpui turin a thehlut dawn a ni.

Aspirational Block hnuaia hmalakna

Healthy Lunglei District Campaign kaltlangin Lungsen Aspirational Block huam chhunga khaw 10-ah natna inkai chhâwn theih loh (non-communicable disease) chungchang inzirtirna leh inentir rûnpui buatsaih a ni tawh a; khaw 10-ah hian mi 481-te hriselna dinhmun endik a ni.

CADS ruihhlo man

Central YMA hnuaia ruihhlo dotu Central Anti Drug Squad chuan kumin May 31 aṭanga nimin thleng khan heroin (no. 4) hawng 7 leh Tictac bûr 71 an man a; ganja kg. 1.685 leh damdawi ruihna atana hman chi dang eng emaw zat an man bawk. Ruihhlo man kaihhnawihah mi 48 an man a, chu'ng zinga mi pali chu Excise & Narcotics hnenah an hlan a ni.