Mipuiin zirtirtu sawn duh loh lantir nan Tlabung H/S zirtirtu leh zirlai an dang

Tlabung High School-a zirtirtu pakhat sawn chhuah a nih avangin Tlabung Joint VC & All NGO Committee huaihawtin nimin khan Tlabung mipuiin Tlabung H/S zirtirtute leh zirlaite sikul kai tur an dang a; zirtirtu sawn chhuah tâk pawh Tlabung aṭanga a chhuak tur an dang bawk.

Tlabung Zodin VC president P Vanlallawma chuan, Modern H/S, Lungtiana mathematics zirtirtu chu Aizawlah sawn a nih avangin Tlabung H/S-a mathematics zirtirtu Esther Lalhlupuii chu Lungtiana awm turin transfer ve nghal a nih thu sawiin, chumi duh loh lantir nan Tlabung H/S-a zirlaite leh zirtirtute an dang tih a sawi.

Tlabung Joint VC & All NGO Committee huaihawta sikul dannaah hian resolution siam niin, Esther Lalhlupuii transfer order chu sût (cancel) an phût thu leh, zirlaite tawrhna tur sorkarin haider lo se an duh thu an tarlang.

Resolution-ah chuan, khaw dang lungawi lohna tuam dan nan sorkarin Tlabung chu hmang tawh lo se an duh thu tarlangin, "Khaw dang buaina vanga kâng ṭhelhna nih fo hi kan kham tawh. Mi khua tihlungawina atana kan khuaa sorkar hnathawk min lak chhuahsak fo hi thleng nawn tawh suh se," an ti.

Tlabung mipuite hian zirtirtu sawn tâk Esther Lalhlupuii'n Tlabung a chhuahsan loh nan an dang mek bawk.

Tlabunga tlawmngai pawlte hian Tlabung H/S-a mathematics zirtirtu transfer order chu June 2, 2025 hma ngeia sût turin sorkar an lo ngen tawh a ni.