SASCI Part-III hi a che hmasa sa tan a nih avangin chêt ran a ṭul - Lalduhoma

Chief minister Lalduhoma chuan, Special Assistance to States for Capital Invest­ment (SASCI) Part-III hnuaia hmasawnna ruh­rel dinna tur sum chu a che hmasa sa tan a nih avang­­in chêt ran a ṭul thu leh department-te'n thâ thlah loa an ṭan a ṭul thu a sawi.

High Level Meeting on SASCI chu nimin khan Chief Minister kaihhruaiin Planning conference hall-ah an ṭhukhawm a, Chief Secretary kaihhruai SASCI Monitoring Committee din an rêl. Reform link incentives hmuh theihna SASCI Part V, VI, VII, VIII, IX leh X aṭangtein incentive a tam thei ang ber dawn tumin sorkar chuan ṭan a la dawn tih tarlan a ni.

Chief Minister chuan, SASCI kalpui meka sorkar duh dante sawiin, "SASCI hi kan ramin hmasawnna ruhrel ṭha leh tlo a neih theih nan a ṭha em em a, department-te'n thâ thlah loa ṭan kan lak a ṭul. Part-III bikah hian state leh UT ten centrally sponsored scheme hmanga infrastructure kan thawhnaa state share-a kan hman theih tur sum vbc 10,000 dah a ni a, first come first serve (a che hmasa sa) tan a nih avangin kan chêt ran a ṭha," a ti.

Hmasawnna hna thawhnaah state rethei deuhte'n harsatna an tawh ṭhin chu state share a nih thu sawiin Lalduhoma chuan, "SASCI Part-III hian chumia kan mutàn chu min sutkiansak thei," a ti a; department hrang hrangte'n SASCI hmalaknaah theihtawp in chhuah ṭhin a ni tih report an pek aṭangin an hre thei tih sawiin, a lawm thu a sawi.

Ṭhutkhawmah hian Planning secretary Lalmalsawma Pachuau-in SASCI part hrang hrang sawifiahin, sorkar hmachhawp leh ṭan lak ngaihna laite a tarlang a; Chief Secretary Khili Ram Meena, SASCI kalpuitu department secretary-te leh sorkar hotu dangte an tel a ni.