Chhiatnaa ṭanpuina pek tur chite a rang lama pek zel kan tum - CM

Chief minister Lalduhoma chuan nimin khan a bial chhunga Serchhip, Thenzawl, Buangpui leh Neihloh khuate a tlawh a, tun hnai ruahsur nasa vanga chhiatna thlengte a enfiah. Chhiatna thlenga ṭanpuina pek tur chite a rang lama pek zel tum a nih thu a sawi.

CM Lalduhoma chuan, chhiatna thlengah sorkarin theihtawp chhuahin hma a la zel dawn tih sawiin, "Vanduaina tâwkte hnena ṭanpuina pek tur chite pawh a rang lama pek zel kan tum a, sorkar laipuiah pawh a rang lamin kan thlen dawn a ni," a ti.

Khuarel chhiatna a thlenin inṭanpuia inpei­zâwn a ngai ṭhin tih sawiin Lalduhoma chuan, "Tun ṭum chhiatna avanga hnam dang khualzin, kawng­a tangkhangte pawh­in Mizo mipui chêt dan an fak viauin ka hria a, kan inpuih tawn ṭhin­na rî hi a ring hle a ni," a ti a; Serchhip DC leh a thawhpui te, sorkar hotu te, tlawmngai pawl leh khawtlang hruaitute hma­laknaah a lawm thu a sawi.

Chief Minister hian Serchhip district hotute chu an district-a chhiatna thlengte a sawipui nghal. Serchhip DC Paul L Khuma tarlan danin, tun hnaia ruahsur nasa vangin Serchhip district-ah in 25 a chhiat vek bakah, in chhe nasa 19 leh a ṭhen lai chhia 18 a awm. Insuan chhuak chhungkua 108 leh leimin 150 a awm a; lei (bridge) panga, vantlang tuizem lian (public water tank) pahnih, tuikhur 18 leh lungrem chhia 20 a awm bawk.