World Environment Day hman a ni

Nimin kha World Environ­ment Day a ni a, Mizoram hmun hrang hrangah hman a ni. Aizawlah chuan Vanapa Hall-ah Urban Development and Poverty Alliviation (UDPA) minister K Sapdanga hoin hman a ni a, vantlang bawlhhlawh bâwm mimal enkawl tura kalpui tur ‘Adopt a dustbin initiative' a tlangzarh. Kumin World En­vi­­ronment Day thupui chu ‘Ending Plastic Pollution’ tih a ni.

K Sapdanga chuan, tun hnaia chhiatna hrang hrang thlengte chu ngun taka chhûtin environment chhiat tawh vang a nih thu a sawi a, "Environment thila min tibuaitu hrang hrang zinga pakhat chu plastic aṭanga thil siam hrang hrang - sarang, tui ûm leh a dangte a ni a, kan paih danah kan fimkhur tawk loh ṭhin avangin environment-ah harsatna kan tâwk chho zel. Mahni leh kan chhungte leh he ram ṭanpui tur hian bawlhhlawh doin ram rawng i bâwl ṭheuh ang u," a ti a; plastic chauh pawh thenfai theih ni se khaw­tlang a nawm dawn thu a sawi.

Environment chhe zelin natna hri chi hrang hrang bakah, khuarel chhiatna tam tak a thlen thu sawiin Minister chuan, "Tun hnaiah leimin leh tuilian vangin kan buai em em a, a chhan chu kan environment a chhiat tawh vang a ni. Kan lui tuite a bawlhhlawh em em a, tibawlhhlawhtu chu keimahni kan ni. Lui tui intu pawh keimahni tho kan ni a, kan tawrh tur harsatna hi keimahni hian kan insiam a ni ber," a ti.

UDPA Minister chuan, environment chhe zel tur vennaah mipui an pawimawh ber thu sawiin, "Siamṭha theitu chu keimahni kan ni. Bawlhhlawh a awm lohna hmuna awmte a paihna tur hmuna paih turin hma la ṭheuh ang u. Sawi leh ngaihthlak ringawt hi a tâwk lo a, kan rilru aṭanga kan veia bul kan ṭan a ngai," a ti a; bawlhhlawh sawngbawl kawnga sorkar hmalaknaah theihtawp chhuahpui turin mipui a sáwm.

Khualzahawm Lalthansanga, Environment, Forest & Climate Change minister pawhin thu sawiin, environment humhalha enkawl chungchangah dan leh hrai a awm thu a sawi a, "Mizote hian dan hi palzût tur emaw kan ti tlat ṭhin hi a pawi. Kan tan a ni a, ram dang pawhin an envi­ronment humhalhna dante an zawm theih chuan keini pawhin kan zawm ve thei tur a ni," a ti.

World Environment Day hmanna hi UDPA department leh Mizoram Pollution Control Board buatsaih a ni a; he ni puala intihsiakna hrang hrang lawmman sem a ni.

World Environment Day hi Indian Council of Forestry Research & Education (ICFRE) - Bamboo & Rattan Centre chuan Bethlehem Vengthlanga an hmunah an hmang a, minister C Lalsawivunga, bialtu MLA-in a hmanpui.

ICFRE-BRC hmuna World Environment Day hmannaah hian Pachhunga University College Eco-Club member te, Save the Riparians hruaitu te, Bethlehem Vengthlang Local Council member-te leh Middle School-II zirlaite an tel a; kawng dung an then fai bakah, rûl entir a ni.

Minister C Lalsawivunga chuan, plastic hmanna tam lutuk titlem turin mahni ṭheuhah bul ṭan a ṭul thu a sawi a, "Kan ram leilung hausakna tichhetu plastic hi a ṭawih ral ve mai loh avangin tihralna leh sawngbawlna mumal a awm loh chuan kan tui tlan tibawlhhlawhtu, leimin thlentu, mihring leh nungchate tana hnawksak a ni," a ti.

Vawi leh khatah plastic tihrêm vek theih ni lo mah se, zawi zawia hmang tlem turin ni tin khawsak dan her rem thiam a ṭul thu sawiin C Lalsawivunga chuan, "Bawlhhlawh chungchangah ‘reduce, re-use, recycle’ hi kan nunpui thiam a pawimawh," a ti a; bawlhhlawh ṭawih thei leh ṭawih thei lo thliar a pawimawh thu a sawi bawk.

World Environment Day hmannaah hian mithiamte'n thupui ‘Ending plastic pollution’ tih sawiin, plastic-in harsatna a thlen dante an sawifiah a ni.

Bethlehem Vengthlanga ICFRE-BRC hi Rain Forest Research Centre hnuaia awm niin, November 29, 2004 khan hawn a ni a, ram hectare 11.63-a zau awhin, mau chi (species) 28 leh Rattan species 11 a awm a, km. 1-a thui bamboo trail a awm bawk.