Mizorama zin rih lo turin chah

General Administration Department (GAD) chuan nimin khan zircular hmangin Mizorama zin tumte tana thuràwn a tichhuak a; state pawn lam mite chu Mizoramah zin rih lo tur leh June 13, 2025 hnu lamah zin turin a chah.

GAD chuan, "Indian Meteorological Department (IMD), Regional Meteorological Centre, Guwahati-in a puan lâwk danin, thlipui leh ruahpui thawk reng thei dinhmunah Mizoram a lan avang leh chhiatna thleng mek leh thleng zel theite thlirin, mipui him tlan zawk nan Mizoram sorkar chuan sorkar laipui leh state dang aṭanga mi pawimawh lo zin turte chu June 13, 2025 hnu lam hun remchang dang lo ruahman hrâm turin a ngen a ni," a ti.

Mizoram pumah ni eng emaw zat chhung nasa taka ruah a sûr avangin chhiatna hrang hrang - leimin, lungrem chim, lung tla, tuilian leh sabereka khuangkaih te a thleng tih tarlangin GAD chuan, "Khuarel chhiatna thleng mek avang hian district hrang hrangah mipui nunphung a buai phah nasa hle," a ti a; circular chhuah chu mi tin him tlan nan leh, chhanchhuah leh chhawmdawl hnate chak zawka thawh a nih theihna tura tih a ni thu a tarlang bawk.