NHM hnuaia thawktu pasarih lakna sût turin MZP-in sorkar an phût

MZP Executive Committee nimina ṭhukhawm chuan, National Health Mission (NHM)-a thawktu pasarih lakah advertisement chhuah leh dan tlawhchhan a awm mumal lo nia an hriat avangin June 10, 2025 ral hmaa hna lakna sût turin sorkar an phût.

MZP chuan, NHM-a thawktu tur lakah advertisement chhuah loa duhsak zawngte lak a awm tih thuthang a hriat veleh an chhui nghal tih tarlangin, "Laboratory technician pathum, staff nurse pahnih, assistant data manager pakhat leh executive assistant pahnihte hi advertisement tel loa lak ngei an ni tih kan hria a ni," an ti.

NHM hnuaia mi pasarih lak dan chu DPAR (ARW) OM Guidelines for Engagement of Co-terminus (Contract or Provisional or Otherwise) Employees under Centrally Sponsored Scheme/Central Sector Scheme/Externally Aided Projects, etc, 2021 tlawhchhan a ni lo niin MZP chuan an tarlang.

MZP chuan, a rûk a râla lak ngei tih a chianga an ngaih thu tarlangin, "NHM hnuaia dan dik taka hna lakte hi an website-ah awlsam taka en leh hmuh theih a nih hlawm laiin, heng kan sawi tak hnate hi khawiah mah tarlan a ni ve lo," an ti.

Ṭhalai hna zawng mek an intlansiak mek laiin, dan loa hna lak a awm ṭhin chu an haw tak zet tih tarlangin MZP chuan, "Inelna thianghlim tak karah ṭhalai a thiam leh tling apiang lak ṭhin ni se kan duh. Ṭhalaite rilru tinatu leh tihnual thei zawnga hmalakna hi engti kawng pawhin kan enliam dawn lo," an ti a; hna lakna June 10, 2025 thlenga sût a nih loh chuan an kal zel dan tur an ngaihtuah dawn tih an tarlang.