Vairengte-in nurse 2 sawnna sût an phût

Vairengte Joint Village Council chuan Vairengte Community Health Centre (damdawi-in)-a thawk nursing officer zinga pahnih sawnna thupek (transfer order) chu sût turin Mizoram sorkar an phût.

Vairengte Joint VC hian nimin khan thuchhuah siamin, "Sorkar hian tuna nursing officer pahnih min transfer sak hi a rang thei ang bera min sûtsak turin kan ngen. Sorkara kan ngenna a hlawhtlin hma chu Vairengte CHC MO in-charge pawh release order pe chhuak lo turin kan ngên a, kan beisei ang thil a thleng lo a nih chuan a ṭul dan angin hma kan la dawn a ni," an ti.

Health & Family Welfare department-in May 2025-a nursing officer transfer & posting a tihchhuahah Vairengte CHC nursing officer pahnih chu sawn zingah an tel tih sawiin Joint VC chuan, "Hriatthiam harsa kan ti," an ti. HFW department-in Vairengte CHC tana nursing officer paruk an lâk zingah, 'A khaw mi duhsak an ni ang' an ti chungin khaw dang mi vek an la a, ngawi renga an lo dawnsawn laiin, khawih chêt leh nghal an ni chu ṭha lo an tih thu an tarlang.

Vairengte Joint VC chuan, Vairengte CHC chu khaw danga CHC-te nen tehkhin chi-ah an ngai lo tih sawiin, "Work load pawh a sang ber kan ni. Heti chunga kan neih sa a heu zawnga in laksak tumna a awm hi sorkar hian min ngaihtuah ṭhatsak se kan ti," an ti. State ramria awm an nih avangin harsatna nasa tak an tawh ṭhin thu sawiin "Indaih a ngaih zual thu sorkar kal taah leh tun sorkara a changtu Minister hnenah pawh sawi a ni tawh a, ṭawngka ringawta a dik alawm intihsak satliah ringawt loa a taka lantir turin kan ngen a ni," an ti bawk.