Power-a harsatna sutkian dan sawiho; Vawiinah Aizawlah pek kim theih beisei
Power & Electricity minister F Rodingliana hoin nimin khan P&E department hotute'n ruahsur nasa vanga kawlphethaa harsatnate sutkian tura hmalak dan an thlir. Khawchhia leh harsatna dang a awm loh chuan vawiin (June 4) ral hmain Aizawl bikah kawlphetha pek kim theih beisei a nih thu an tarlang.
Ṭhutkhawmah hian district hrang hranga kawlphetha pekna (power line) chhia thawm ṭhat dan enho a ni a; tun dinhmunah 33kV North Bukpui Sub-Station tih loh chu sub-station tin aṭangin kawlphetha dawn kim tawh a nih thu leh, North Bukpui Sub-Station pekna line pawh endik mek a ni a, kawlphetha pek chhuah theih thuai beisei a nih thu sawi a ni.
Khaw ṭhenkhat power supply pek chhâwnna feeder line chhia awmte a tahtawla siamṭhat mek zel a nih thu te, distribution transformer chhiate thlak mek zel niin, nimin khan transformer panga pek chhuah a nih thu te, khawchhia leh harsatna dang a awm loh chuan June 4, 2025 ral hmain Aizawlah chuan kawlphetha pek kim theih beisei a nih thute sawi a ni bawk.
Chawnpui Sub-Station aṭanga Aizawl tlak lama kawlphetha pekna, a bikin Dinthar, Tuikual leh Dawrpui Vengthar châwmtu line, tu nhnaia chhe zing bik chu tihziaawmna turin a rang lama hmalak an rêl a; hna hmasaah feeder pumpui shutdown lak ngai loa a chhe laite thliar zung zung theih nan line-gang vuah an rel a ni.
F Rodingliana chuan, Union Power Minister-in August 5, 2024-a a tiam tawh angin, Zuangtui leh Bukpui inkar 132 KV line load tam zawk keng thei HTLS conductor-a thlakna tur leh Mizoram hmun hrang hranga sub-station pasarih - Bawktlang, Saitual, Melriat, Khawzawl, Champhai, Serchhip Bukpui leh East Lungdara transformer lian zawk dahna tur cheng vbc 47.87 chu DoNER-in an rawn pek chhuak tawh tih a sawi.
Minister chuan, "He project hi zawh a nih chuan Zuangtui leh Bukpui (Serchhip) inkara megawatt 80 chauh load la thei ṭhin kha megawatt 200 thleng load an la thei tawh dawn a; Saitual, Khawzawl, Champhai leh Serchhip district ten an ṭangkaipui hle dawn a ni," a ti.