KHAWTHLIR

Exam hun sawn

Mizoram Board of School Education chuan June 6, 2025-a Higher Secondary School Leaving Certificate (Compartmental & Improvement) Examination neih tura a lo ruahman tawh chu tunlaia ruahsur nasa leh hmun hrang hranga chhiatna thleng vangin June 12, 2025-ah sawn a nih thu a puang. Kumin HSSLC-ah hian compartmental exam hmachhawn tur zirlai 79 leh improvement exam ti tur zirlai 29 an awm a ni.

PACS pisa hawng

Mizoram Cooperative Apex Bank chairman Lalnunsanga chuan nimin khan Thingsul Tlangnuam MPACS Ltd. office a hawng. Lalnunsanga chuan, Mizoramah cooperative movement a la mumal tawk lo tih sawiin, "In hnungah Apex Bank kan kal reng a, sum mamawh leh inpuih theihnaah chuan hma kan laho zel ang," a ti.

Chhawldawlna pek dan tur sawiho

Lunglei High Powered Committee (HPC) vice chairman V Malsawmtluanga, MLA hoin Lungleia sorkar official-te chuan nimin khan Lunglei district chhunga tun hnai ruahsur nasa vanga chhiatna thlenga chhawmdawlna pek dan tur an sawiho. Chhiatna kaihhnawiha department-te hmalak dan thlir a ni a, hmalak zel dan tur leh ṭanpuina pek dan turte sawiho a ni. V Malsawmtluanga chuan, chhawmdawlna atan HPC fund hman theih a nih thu sawiin, hman dan tur sawiho a ni bawk.

Bawrhsapin tlawh

Kolasib bawrhsap Robert C Lalhmangaiha chuan nimin khan ruahsur vanga Bairabi leh a chhehvel, a bikin Tlawng dunga cheng, tui chîm chin san vanga hmun him lama insaseng ngaite dinhmun a enfiah. Khawtlang hruaitute nen an inkawmnaah Bawrhsap chuan, an harsatna tawh dan leh eng anga ruahmanna siam tur nge tihte chu Bairabi an tlawh chhan ber pakhat a nih thu a sawi. Bairabi-ah hian chhungkaw 25 chu hmun him lamah an insawn chhuak a ni.