CM-in Union MoRTH Minister hnenah Concrete-a kawng siam a ṭul thu a thlen

Ministry of Road Transport & Highways minister of state Ajay Tamta leh chief minister Lalduhoma chu nimin khan CM Banglaah an inâawm a; CM chuan, Mizoramah kawngpui a siamna senso sang mah se, enkawlna senso a hniam avangin concrete-a siam ṭha a tih thu a thlen.

CM Lalduhoma chuan, Mizorama national highway-te chu awlsam zawk leh rang zawka thawh a nih theih nan Strategic Highway-a puan ṭha a tih thu a sawi a, "Fûr ruahtui tlak tamna ram kan nih avangin concrete zela kawngpui siam a ṭha ka ti a, concrete hi a thawhna senso sang mah se, a enkawl zuina senso (maintenance cost) a hniam a, a tlo bawk a ni," a ti.

Silchar-Aizawl inkar kawngpui thlûr li ni tura laih mekah Kawnpui leh Sairang inkara hna thawhna tur sum pe chhuak rang turin Chief Minister chuan MoRTH Minister of State a ngen a; "He kawngpui hi India ram laili nena kan inkalpawhna kawngpui pawimawh bik a ni a, Kawnpui-Sairang hi kutthlak a nih rih loh avangin nikum fûrah nasa takin harsatna kan tâwk a, kuminah harsatna kan tâwk leh mek. Hna thawhna tur sum sorkar laipuiin a la pe chhuak lo a, rang taka min pek a, hna ṭan vat kan ngai a ni," a ti a; Mizoram châk lâkna kawngpui berah hna thawh chak a ngaih thu a sawi.

Ajay Tamta chuan, CM Lalduhoma thil sawite chu theihtawp chhuaha a lo bawhzui tur thu a sawi a; Mizorama heliport din tura hmalak mek chungchang an sawi dun bawk.