NAAC team-in MZU an endik ṭan

India rama zirna-in sangte endika grade petu National Assessment and Accreditation Council (NAAC) Peer Team chuan nimin aṭang khan Mizoram University an endik ṭan.

MZU endik tura NAAC Peer Team rawn kal hi member pakhat a ni a, nimin khan MZU tlawhin, vice chancellor Prof. Dibakar Chandra Deka leh hotu dangte'n an lo dawngsawng. MZU hotute nen Academic Conference Hall-ah an inkâwm a, Peer Team member dang pangate online-in an tel bawk.

Prof. Dibakar Chandra Deka chuan, MZU inrêlbawl dante leh department hrang hrang hnathawh dan tlangpui a sawi a; MZU Internal Quality Assessment Council (IQAC) director bakah, dean-te'n an dinhmun, hmasawnna leh inrelbawl dante an sawi bawk.

NAAC Peer Team hian ni thum chhung, June 5 thleng MZU an endik dawn a; a hmuna kal member-in a hmunah a endik bakah, member dangte chu online hmangin endiktir an ni dawn a, virtual live tour buatsaihin, MZU department hrang hrang leh campus chhunga hmunhma hrang hrangte an endik dawn a ni. Zirlaite, office-a hnathawkte leh MZU Alumni te nen an inkawm dawn bawk.

NAAC hi University Grants Commission hnuaiah autonomous body a ni. NAAC accredition hi kum 5 dana neih ṭhin a ni a, MZU hi kum 2014 leh 2019 khan NAAC-in an lo endik tawh a, kum 2019 khan grade ‘A’ an pe a ni.