Vaivakawnah chhungkaw 11 sawn chhuak

Vaivakawn Zohnuaiah lei a chêt nasat avangin nimin khan YMA, Vaivakawn Branch bultumin chenna in pangaa chhungkaw 11 chu an bungrua thiar chhuahsak an ni.

YMA, Vaivakawn Branch hruaitute hnen aṭanga Vanglaini thu dawn danin, chhungkaw pali chu YMA hall-ah awmtir an ni a, chhungkaw pakhat chu kohhran hall-ah awmtir niin, a dang zawng chuan chhungte an bêl.

Hetih lai hian, chenna in pahniha chhungkaw pali chu an bungrua thiar chhuah ni lo mah se, Aizawl DC lam aṭanga riak chhuak tura an tih angin, an riak chhuak bawk.

Vaivakawn Zohnuaiah hian lei a che nasa a, hmun eng emaw zatah thûk tak takin lei a khì a; vanduaina thlen palh thulhah chhungkaw pakuate bungrua thiar chhuahsak a ni.

Vaivakawna lei chetna hmun hi bialtu MLA Lalnghinglova Hmar, minister of state chuan nimin khan a tlawh a, DMR minister Prof. Lalnilawma'n nimina a tlawh pawh a lo dawngsawng.

DMR Minister, bialtu MLA, sorkar official-te leh khawtlang hruaitute'n hmalak zui dan tur an sawiho a; transformer sawn dan tur an ruahman a ni.