Garbage Free City Lunglei Project hawng

Lunglei Municipal Council (LMC) hnuaia bawlhhlawh awm lohna khawpuia Lunglei siam tura duan 'Garbage Free City Lunglei Project' chu nimin khan minister Lalrinpuii, Lunglei East bialtu MLA ni bawkin Lunglei Convention Centre-ah a hawng. Minister chuan, project a hlawhtlin theih nan chhungkaw tina nute an pawimawh hmasak thu a sawi.

Garbage Free City Lunglei Project hi kum 2024-a ward faia thlan pali - Ward I, II, IX leh XI-ahte pilot project anga kalpui hmasak tur niin, cheng nuai 60 vel ruahman a ni a; kum tin ward dangah kalpui belh zelin, kum thum chhungin ward 11 tuam kim tum a ni.

Sorkar department, zirna-in, local council, tlawmngai pawlte leh mipui nen ṭanghoa hmalakna tura ruahman a ni a; inzirtirnate leh a remchan angin intihsiaknate buatsaih tum a ni bawk.

Minister Lalrinpuii chuan, LMC hotute'n hmathlir thui tak neia bawlhhlawh awm lohna khawpuia Lunglei siam tumnaah a phûr thu a sawi a, "A hlawhtlin nan sorkar leh mipui thawhhona ṭha a pawimawh dawn a, chhungkaw tina nute chu a pawimawh hmasa an ni dawn. Bawlhhlawh thliar hi nuhoin choka aṭanga an ṭan a, chhungkuaah bawlhhlawh paih dan dik leh faina chungchang an inzirtir chuan a hlawhtling thuai ang," a ti.

Khawpui fai ni turin bawlhhlawh siamtu leh leilung tichhetu sarâng lam chi hman tlem a ṭul thu sawiin Lalrinpuii chuan, "Hman nawn theih hman nawn a, thehthang kawngah fimkhur a ṭul. Tui chhawp nan plastic bûr aia saidawiúm hman te, bazarnaah plastic ip hmang loa èm emaw, ip pangngai emaw hman a pawimawh," a ti a; Lunglei chu khawpui fai, thianghlim, mawi leh nuam a nih theih nan theihtawp chhuah turin mipui a sáwm.

Health Minister chuan, mi rethei leh harsa zawkte hmakhua ngaiin sorkarin hmalakna tam tak a kalpui thu sawiin, ruang phurh man sorkarin a tumsak chu mi harsate tana sorkar hmalakna lawmawm a nih thu a sawi a, "Dam loh nikhuaa pûk chawp leh a bá thlaua damdawi-in aṭanga inkhul chhuak ṭhinte tan pawh pawisa chawi ngai loa an inenkawl theih dan tur mipui healthcare (MUHCS) sorkarin a duang a, hei hi mipui tan malsawmna a ni," a ti.

Garbage Free City Lunglei Project hawnna inkhawmah hian Lunglei South bialtu MLA Lalramliana Papuia, LMC chairman Lalzuithanga leh councillor te, sorkar official te, local council, YMA, MHIP, MUP leh MJA aiawh te, Lunglei Nursing School leh HATIM zirlaite an tel a ni.