CM hoin ILP leh Railway Police sawiho

Chief minister Lalduhoma hoin nimin khan a pisaah sorkar hotute'n Inner Line Permit (ILP) leh Railway Police chungchang an sawiho. Department of Personnel and Administrative Reforms (DPAR) chuan a thuphungin Railway police dinna tur a pawm tawh tih tarlan a ni.

Ṭhutkhawmah hian ILP kaihhruaina (guideline) thlir lêt a ni a; belh tura rawtna te, online ILP Phase-II kalpui dan tur te, permit-in a phal chin aia rei Mizorama châm rute dap chhuahna leh Railway Police dinna tur chungchangte sawiho a ni.

Home secretary Vanlalmawia'n online ILP kalpui mek chungchang sawifiahin, tih belh leh siamṭhat ngai tura rawtna an dawnte a tarlang. ILP hi online veka kalpui theih a la nih loh avangin hmun ṭhenkhatah chuan tun hmaa kal dan (offline) anga kalpui rih ni.

Railway Police din chungchangah DPAR lam chuan a thuphungin dinna tur pawm a ni tawh tih an tarlang a; zirchianna neih chhoh mek a nih thu leh Sairang rel chawlhhmun (station) June 2025 thla chanve velah hawn theiha peih a ni mai tawh dawn avangin a rang lama hmalak a ṭul thu sawi a ni bawk.

Ṭhutkhawmah hian Home minister K Sapdanga leh sorkar official pawimawhte an tel a ni.