Chhiatna thlengah râlna leh ṭanpuina hlan

Tun hnaia ruahsur nasa vanga chhiatna hrang hrang thlengah district bawrhsapte chuan an huam chhunga chhiatna thlenna hmunte an tlawh a; sorkar aṭanga ṭanpuina leh mitthite râlna an hlan.

Chief minister Lalduhoma hoa June 1, Pathiannia sorkar hotute ṭhukhawm chuan ruahsur nasa vanga Mizorama chhiatna thleng chungchang an sawihonaah, chhiatna thlengah a rang lamin chhawmdawlna (relief fund) pek chhuah zel ni se, an tih angin, nimin khan Serchhip leh Khawzawl bawrhsapte kaihhruaiin ràlna leh ṭanpuina sem a ni.

Serchhipah chuan bawrhsap Paul L Khuma'n Serchhip P&E Venga khuarel chhiatna vanga thi Ramzolura chhungte hnenah State Disaster Relief Fund aṭangin ràlna (ex-gratia) Rs 4,00,000 a hlan a; Ramzolura farnu Zomuani hnenah leiminin an in a tihchhiat vanga ṭanpuina Rs 1,30,000 a hlan bawk. Zomuani te chhungkua hi BDO Rest House-ah awm lailâwktir an ni.

Khawzawl bawrhsap K Vanlalṭhiana chuan ruahsur nasa vanga chhiatna thlenna hmun enfiahin Kawlkulh, Dulte leh Puilo khua a tlawh a; village council hruaitute leh mipui nen inkâwmin, tarpauline leh direct benefit transfer (DBT) hmangin ṭanpuina pawisa a hlan.