MCC-in Graduation Day an hmang

Mizoram Christian College (MCC) chuan nimin khan Woodland Hills, Aizawlah Gradua­tion Day an hmang a; principal Dr Tawnenga chuan zirlai chhuak turte chu an chhuahna MCC-in thlarau, taksa leh rilru lama a chherna hmang ṭangkai zui turin a fuih.

Dr Tawnenga chuan, MCC-in Graduation Day an hman chu a vawi thumna a nih thu sawiin, zirnaah hma an sawn zel thu a sawi a; zirlai kal chhuak turte chu MCC-in thlarau, taksa leh rilru lama a chherna hmang ṭangkai zui tur leh an chhungkua, kohhran, khawtlang leh ram tana hmasawnna thlentu ni turin a fuih bakah, MCC motto 'For God and My Country' tih chu an nun kaihruaitu atana vawng tlat turin a chah.

MCC Principal chuan, zirtirtu leh thawktute'n hna an thawhna an hlawhtlin zel theih chhan chu Mizoram Synod-in a enkawlna leh a thlâwp tlat vang a ni tih a sawi a; Tanhrila MCC campus thar chu kum 2028-ah luah theih beisei a nih thu a sawi bawk.

Inkhawmah hian MCC vice principal Dr Benjamin Lalfakzuala'n zirlai kal chhuak turte fuihna thu a sawi a; MCC Governing Board member Prof. Lianzela pawhin thu a sawi. Graduation Day hi Synod executive secretary i/c MCC Rev. Rosiamliana Tochhawng pawhin a hmanpui a ni.