MoRTH Minister-in Hnahthial a tlawh

Ministry of Road Transport and Highways (MoRTH) minister of state Ajay Tamta chuan nimin khan Hnahthiala Samagra Shiksha hnuaia higher secondary school building sak mek leh NESIDS hnuaia Hnahthial District Hospital sak mek a endik.

Ajay Tamta hian Science leh Commerce stream tana HSS building sak mek chu endikin, an harsatna tawhte a zawt a; Hnahthial district education officer H Sangthanga'n in sak tawh dinhmun sawiin, a vaiin zirlai 120 vel awm thei tura beisei a nih thu a sawi.

MoRTH MoS hian Hnahthial District Hospital tlawhin, ward a fang kual a, damdawi-inin harsatna an neihte a zawt a, District Hospital main building sak mek a enfiah bawk. Damdawi-in sak mek hi khum 50 awm theihna tur a ni.

Sikul leh damdawi-in sak lai a endik zawhah DC conference hall-ah Hnahthial district-a department/office hotute nen central scheme pawimawh zualte thlirho a ni a; Hnahthial addi-tional DC Zothanmawia Khiangte-in a kaihruai a, SDC R Vanlalruata'n central scheme hrang hrang kalpui a nih dan a sawifiah.

Ṭhutkhawma tarlan danin, Hnahthial district-ah hian zirlai 6,270 an awm mek a, mipa 3,046 leh hmeichhia 3,224 an ni a; primary school-ah zirlai 2,859, middle school-ah 1,990, high school-ah 996 leh HSS-ah zirlai 425 an awm. Kum 2024-25 financial year chhung khan Hnahthial district-ah HIV vei mi 17 hmuh chhuah a ni.