Lalthangfala Sailo thlah liam a ni

Mizo thu leh hlaa thawh hlâwk berte zinga mi Lalthangfala Sailo (92), Chaltlang chu June 1, Pathianni zan dar 7:40 khan a thi a, nimin khan vui niin, vuinaah hian mi ṭhahnem tak an tel.

Lalthangfala Sailo hi July 16, 1933-ah a piang a, Cotton College, Gauhati aṭangin intermediate of arts (IA) zovin, St. Xavier's College, Calcutta-ah BA a zo a, Gauhati Univesity aṭangin MA a zo leh a ni. Lalhrimi Sailo nen kum 1962-ah an innei a, fapa pathum leh fanu pakhat neiin, tu eng emaw zat a nei.

Union Christian College, Barapani leh St. Edmund's College, Shillong-ah zirtirtu hna a thawh ṭhin bakah, Champhai College-ah principal a ni tawh a; North Eastern Hill University (NEHU), Mizoram Campus-ah deputy registrar a nih laiin pension-in a chhuak. Mizo Academy of Letters-ah hun rei tak President a ni tawh bawk.

Thawnthu leh lemchan eng emaw zat a ziak a; a kutchhuak zingah 'Sangi Inleng' (1959), 'Liandova te Unau' (1969), 'Kalkhama leh Lianphunga' (1999) leh 'Sual Man Thihna' (1999) tihte a tel. A lemchan ziahte hi college zirlaiah telh a ni hlawm. Vanglaini-ah pawh article eng emaw zat a thawh tawh a ni.

Lalthangfala Sailo hian Mizo thu leh hla leh zirnaah a thawh hlâwk avangin kum 2009 khan Education & Literature huangah Padma Shri a dawng a; Sangeet Natak Akademi Award, Bharat Adivasi Award, Pu Buanga Award, Mizo Academy Award, Mizo Literary Award leh Mizo Drama Award te a dawng tawh bawk.