Leimina thite hriatrengna thuziak târ
May 28, 2024 khan Cyclone Remal vangin Mizoram hmun hrang hranga chhiatna a thleng a, mi 34 an thi. Nimin kha a champha vawi khatna a nih avangin Hlimen khawtlang chuan leimin vanga an veng chhunga thite hriatrengna atan an veng chhungah thuziak (banner) an tár.
Hlimenah hian May 28, 2024-a leimin vangin mi pakua thiin, Mizo panga leh hnamdang pali an ni a; Mizo thite chu chhungkaw pahnih an ni. Chhungkaw pakhatah nupain an thi a, an fanu a dam chhuak thung. Chhungkaw pakhat zawk, mi pali awmnaah pathum an thi a ni.
Chhiatna thleng vang hian chhungkaw 79-te chenna in chu hmun hlauhawm (danger area)-ah sorkarin a puang a; chu'ng zinga chhungkaw 42 chu sorkarin relief camp a siamah an awm a, mi dang zawng chu mi in luah leh chhungte bêlin an awm.
Relief camp-a awmte hi January 2025 thleng awm tura ruahman a nih angin, hun tiam a ral hnuah a tam zawk chu an chênna ngaiah an lêt leh a, chhungkaw ṭhenkhat erawh chu tun thlengin relief camp-ah an la awm a ni.
Fûr a nih dawn ṭan tawh avangin Hlimen khawtlang hruaitute chuan Transport department leh sorkar hotute an biak hnuah relief camp-a awm theih hun chhung chu October 2025 thleng pawh sei a ni a; tunah hian chhungkaw 39 vel relief camp-a awm leh turin an inbuatsaih mek nia thu dawn a ni.