Internet leh smartphone kaltlanga inbumna a hluar - Mizoram Police

Mizoram Police chuan thuchhuah siamin, tunlai hian internet banking leh smartphone kaltlanga inbumna a hluar thu an tarlang a, "Mipui kan fimkhur a ngai hle," an ti.

Mizoram Police tarlan danin, tun hnai khan Zarkawt mi pakhat chu BSNL office-a thawk anga insawi mi pakhatin mobile phone number 7001527402 hmanga biain, a BSNL phone post-paid bill la pek loh chungchangah online-a pe mai tura ràwnin, a puih theih thu a hrilh. Mobile phone application pahnih Team Viewer QuickSupport leh BSNL Wallet (BSNL Mobikwik)-te Playstore aṭangin a download tir a, Zarkawt pa chuan amah betuin a tihtir dan zela tiin, phone bill chu ATM debit card hmangin a pe a ni.

Bill a pek hnu deuhah bill an pe tawh ngei tih nemnghehna (confirmation) BSNL site aṭangin a awm lo tih chhuan­lamin a bill pektir dan (process) ngai chiahin a tih nawntir leh a, chumi chhung chuan a account aṭangin Rs. 45,000 a lo la chhuak hman a ni. 

Pawisa lak chhuah hriattirna (SMS notification) chu phone-ah a thlen nghal mai loh avangin rinhlelhna an nei nghal mai lo a, a tûkah phone hmanga be lehin, an mobile bill pekna chu a luh nawn avangin, an account-ah BSNL-in pawisa a pêkkir theih nan mobile wallet application chu lo hawng a, an account-ah pawisa a lut em tih SBI Quick leh SBI Online Banking hmanga lo enfiah turin a ti leh a, chumi chhung chuan bank account aṭangin Rs. 50,000 a la chhuak leh bawk.

A ṭum hnihnaah pawh bank account aṭanga pawisa lak chhuah hriattirna phone-ah a thleng nghal mai lo a, a hnuah internet banking password thlenga type leh tura a tih tâk avang leh, pawisa lak chhuah hriattirna phone-a a hmuh ngai loh avangin inbumna a nih ringin, SBI thuneitute hnenah ATM card leh bank account-te khawih chêt theih lohin an dahtir a; Aizawl Police Station-ah April 16, 2020 khan FIR an thehlut bawk a, police-in an chhui mek a ni.

Mizoram Police thu­chhuah chuan, Covid-19 vanga inkhàrkhip mek a nih thu sawiin, "Hei hi misual mi bum hmangte pawhin hri léng vanga buainate remchanga lain, chêt dan tur kawng hrang hrang an dap ve thuai ṭhin a, inbumna kawng thar hrang hrang a chhuah belh zel rin a ni. Hetiang inbumna lakah hian fimkhur turin mipui kan ngen thar leh a ni," a ti.