Manipal Hospitals-in Aizawlah OPD hawn an tum

Manipal Hospitals hotute chuan May 24, Inrinni khan Aizawl Press Club-ah thuthar thehdarhtute an kâwm a; Aizawlah natna chi hrang hrang atan out patient department (OPD) an hawn dawn thu leh kum 15 chhungin Mizoram mi dam lo 15,000 chuang an enkawl tawh thu an sawi.

Manipal Hospitals hotute chuan, cardiology, cardiac surgery, neurosurgery, orthopaedics, oncology, nephrology leh natna dang ṭhenkhatahte Aizawlah OPD an siam dawn thu an sawi a, "OPD hi Aizawla damdawi-in dangte behchhan loin keimahni liau liauin hawngin kan enkawl dawn a, a hmun tur kan nei tawh a, kan hawn thuai kan beisei," an ti.

Manipal Hospitals hi an hmunpui chu Bengaluru-ah a ni a, India ram khawchhak lamah an inzar pharh mek. Mizote'n Kolkata-a damdawi-in an pan nasat damdawi-in Medica Superspeciality Hospital, AMRI Hospital pathum leh Columbia Hospital te chu an lei tawh a; Kolkata-a damdawi-in khum ngah ber an nih thu leh damdawi-inte chu hmanraw thar ṭha ber ber hmanga thuam a nih thu an sawi.

Manipal Hospitals-te'n Mizoram aṭanga damlo an enkawl zinga natna tam ber zawhna chhangin Manipal Hospitals hotute chuan, neurology (thluak lam) kaihhnawih natna a tam ber thu an sawi a; chuap cancer leh thyroid lam natna pawh a tam thu an sawi bawk.

Mizoram Universal Healthcare Scheme (MUHCS) chungchang zawhna chhangin, "MUHCS rate chungchangah Mizoram sorkar nen kan indawr mek a, inremna kan ziah thuai kan beisei," an ti.

Manipal Hospitals-in a enkawl tâk damdawi-inahte kum 15 chhungin Mizoram aṭanga kal damlo 15,000 chuang enkawl a nih tawh thu an sawi a, "Heng zingah hian Medica Superspecialty Hospital-a kal thlak hlawhtlin mi 70 chuang an awm tawh a, hlawhtlinna rate 95% a ni," an ti a; Mizoram leh hmarchhak state hrang hrangah hriselna dinhmun a ṭhat theih nan hma an lak dawn thu an sawi.