Tourism tihhmasawn nan MoU ziak dawn

Ministry of Railways hnuaia The Indian Railway Catering and Tourism Corporation (IRCTC) leh Mizoram Tourism department chuan Sairang thlenga rél a lo luh huna tourism tihhmasawnna kawnga thawkho turin memorandum of understading (MoU) an ziak dawn.

IRCTC tourism officer Lalsawmliana Hmar leh Manish Kumar-te chuan nimin khan Aizawl Press Club-ah thuthar thehdarhtute an kawm a; Mizorama tourism tihmasawn turin Mizoram Tourism department nen karleh lama MoU ziak tura an inbuatsaih mek thu an sawi a, "MoU kaltlang hian Mizoramah tourism tihhmasawn tum a ni a, Mizo mipuite tan pawh man tlawm taka khawvel ram hrang hrang tlawh theihna tur tour packages siam a ni dawn," an ti.

Kristiante hmun pawimawh hrang hrang tlawh theihna 'Bibical Pilgrimage tour' pawh an kalpui thu sawiin IRCTC hotute chuan, "He pilgrimage tour kaltlang hian Greece rama Korinth (Corinth), Thessalonikia (Thessaloniki), Athens khuate leh Patmos thliarkar te leh Italy rama Rome khawpuite tlawh theihna hun ṭha a awm dawn," an ti a, pilgrimage tour package hian zin man, ei leh in, hotel leh tour guide etc. thlenga a huam thu an sawi.

IRCTC hotute chuan Sairang thlenga rel a rawn luh hunah hotel, sumdawnna, tour guide leh thil hrang hrangah Mizo mipuiten hlawkna tel theihna tur hrang hrang an neih dawn thu an sawi bawk.